‘n Formele klag oor die bedenklike toestand van die Landboukollege Potcefstroom is Dinsdag (1 Februarie) by dr. Pontsho Mokaila, hoofdirekteur van die Noordwes se departement van landbou, ingedien.
AfriForum Jeug sê hulle klag is deur die veiligheid- en gesondheidsverslag wat deur ‘n onafhanklike inspekteur gedoen is, vergesel.
Dié verslag is in Desember verlede jaar saamgestel, nadat die inspekteur die kampus besoek het, en bevind het dat die kollegebestuur aanspreeklik gehou kan word vir insidente wat weens die verwaarloosde toestand van die kollege ontstaan of voorkom.
Dank Serage af
In dié klagte word weereens versoek dat mnr. Dipepeneneng Serage, direkteur van die kollege, van sy pligte onthef moet word, “aangesien studente, ouers en burgerlike organisasies al sedert die begin van 2010 by Serage gekla het oor toestande by die kollege, maar telkens met sarkastiese opmerkings en ? gebrek aan optrede begroet is.”
Die volgende is ook onder Mokaila se aandag gebring:
Dosente wat nie in staat is om lesings te gee in die voorgeskrewe onderrigtaal nie;
onhigiëniese en onveilige toestande by die kollege; en
swak bestuur deur die kollegebestuur en in die besonder die kollege se direkteur.
Skending van regte
Mnr. Ernst Roets, AfriForum Jeug se nasionale voorsitter, sê hulle het met verskeie van die kollege se studente in verbinding getree, maar bykans almal het reeds hulle studies weens die toestande gestaak.
“Die omstandighede by die kollege kom neer op ? growwe skending van die studente se regte. Ons sal aanhou om stappe te neem totdat aandag aan die probleme geskenk word,” sê Roets.
2 Februarie 2011
