Die wêreld bevind hom in ’n vreemde tyd waar voedselsekerheid in baie ontwikkelde lande nie meer ’n gegewe is nie. Suid-Afrika is wat dit aanbetref, betreklik goed verskans teen hierdie internasionale neiging danksy die land se sterk landbousektor, het dr. John Purchase, voormalige uitvoerende hoof van Agbiz, op die onlangse Agri Limpopo-kongres.
Hy het gesê mense moet kennis neem van ’n dreigende voedselkrisis wanneer hoofopskrifte van leidende publikasies soos Economist, die Financial Times in Londen en Washington Post daaroor waarsku.
Dit het begin met die covid-19-pandemie en is vererger met die Russiese inval van Oekraïne vroeër vanjaar, het Purchase gesê. Voedselpryse het die hoogte ingeskiet en begin nou eers daal namate daar weer ’n balans tussen vraag en aanbod bereik word.
In Suid-Afrika is verbruikersvoedelprysinflasie van 9% in Junie aangeteken, maar Purchase het daarop gewys dat dit in 2013, 2014, 2016 en 2017 tydens die droogte al hoër as 9% was.
Suid-Afrika is ook baie beter daaraan toe as baie ander lande. “As ’n mens na voedsel-inflasie in ander lande kyk, sien jy in Zambië en Kenia staan dit op 12%, in Brasilië op 13% en in Amerika en die Europese Unie is hierdie inflasie hoër as in Suid-Afrika. Ons is dus in ’n beter posisie as baie ontwikkelende én ontwikkelde lande.”
Hoewel baie van Suid-Afrika se landbouprodukte teen uitvoerpariteit verhandel wat wel voedselpryse opstoot en bydra tot voedselinflasie, het goeie mielie-oeste die afgelope twee jaar gesorg dat stapelvoedsel bekostigbaar bly.
“Dit is belangrik dat ons nie net teen Suid-Afrika se probleme vasstaar nie, ons moet ook die ligpunte sien en die landbou is ’n groot ligpunt in Suid-Afrika. Dit is waarskynlik die sektor wat tans die beste presteer in die Suid-Afrikaanse ekonomie.”
