Indiensneming in die landbousektor het in die vierde kwartaal van 2021 toegeneem tot 868 000 teenoor 829 000 in die derde kwartaal van 2021 en 810 000 aan die einde van 2020. Indiensneming in die landbou het egter in die Wes-Kaap, Vrystaat en Limpopo met onderskeidelik 19 000, 6 000 en 9 000 werksgeleenthede gedaal.
Só is bevind in Statistieke Suid-Afrika nuutste kwartaallikse arbeidsmag-opname. Die resultate is op 29 Maart bekend gemaak.
Mnr. Lebogang Sethusha, arbeids-en-indiensnemingskundige by Agri SA, sê die indiensneming van geskoolde landbouwerkers het steeds nie herstel nie. Luidens die opname is 85 000 geskoolde landbouwerkers in die vierde kwartaal van 2020 in diens geneem teenoor 68 000 in die vierde kwartaal verlede jaar – ’n afname van 20,6%.
“Hoewel daar sprake van herstel gedurende die derde kwartaal was, is daar nog baie herstel wat voorlê. Dit bly ’n bron van kommer dat die afname in geskoolde landbouwerkers ’n verlies aan vaardighede in die sektor verteenwoordig.”
Hy sê ten spyte van die opname se gunstige resultate, word die landbousektor se groei gekniehalter deur swak infrastruktuur wat onder meer paaie, spoorweë en hawens betref, asook ander probleme soos stygende insetkoste.
“In hierdie moeilike klimaat toon die groei in die landbousektor se indiensneming dat die sektor steeds die vermoë het om arbeid te absorbeer en broodnodige werksgeleenthede te verskaf. Deur die sektor se probleme uit die weg te ruim, sal die sektor selfs meer werksgeleenthede kan skep gedurende ’n moeilike tyd wat die ekonomie van die covid-19-pandemie herstel.”
Die potensiaal om arbeid te absorbeer tesame met die voortgesette swak herstel in die indiensneming van geskoolde landbouwerkers dui volgens hom op die noodsaaklikheid van belegging in opleiding.
“Agri SA en sy lede is daartoe verbind om geleenthede te skep vir laaggeskoolde werkers en om doeltreffende opleidings- en onderrigprogramme te bevorder om aan diegene wat deur die sektor in diens geneem word, vir meer geskoolde rolle in aanmerking te laat kom.”
