Altesaam 21 toerlede is tans op Landbou.com se geenbewerkingtoer in Argentinië. Die toerlede het Sondagoggend uit Suid-Afrika op dié toer van 10 dae vertrek.
Die toer is met die samewerking van Laurik International gereël en fokus op besoeke aan saaiplase in Argentinië wat vergelykbaar is met Suid-Afrikaanse toestande. Meer as 70% van die graan in Argentinië word onder geenbewerking verbou.
Die lede van die toergroep woon ook ‘n lesing en bespreking deur die Geenbewerkingsassosiasie van Argentinië by en besoek ‘n fabriek wat planters vir geenbewerking vervaardig.
Twee kundiges van die Wes-Kaapse departement van landbou, drr. Johann Strauss en Johan Labuschagné, is lede van die toer. Al twee doen werk en navorsing op verbouingspraktyke van graan. Boonop sluit ‘n Argentynse akkerboukundige, mnr. Carlos Gutiérrez, by die toer aan om eerstehandse inligting te verskaf.
Die volledige toerprogram is op Laurik se webwerf te lese.
21 September 2010
