'n Afgetrede boer van Petrus Steyn koester 'n eksemplaar van Landbouweekblad van 3 Julie 1929! Wie het 'n ouer Landbouweekblad as dit?
Mnr. Johan Schoonraad (80) van Petrus Steyn, se vrou, me. Santjie Schoonraad, het 'n foto van haar man en dié ou weergawe van Landbouweekblad aangestuur.
By navraag het hy laat weet dat hy dié besondere eksemplaar by 'n boerevriend van Kestell gekry het. Dié het dit weer op 'n solder van die huis gevind.
Me. Schoonraad vertel dat hulle hul vergaap aan al die advertensies in die tydskrif, soos trekkers wat met ysterwiele toegerus is en pragtige kamerstelle uit duursame hout vir die prys van 35 pond. Kyk ook die intekengeld van 15 sjielings per jaar! (Dis R1,50.)
Mnr. Schoonraad is 'n boer in murg en been wat op die Hoëveld met graan en tabak geboer het, en ook by Vryheid en Harrismith. Hy en sy vrou woon deesdae in 'n aftree-oord op Petrus Steyn.
* Die eerste Landbouweekblad se verskyningsdatum was 21 Mei 1919.
