’n Gebrek aan mannekrag is een van die leemtes rondom speenkalfinvoer vanaf Namibië. Dít het onlangs duidelik geword op ’n vergadering tussen die Direktoraat Dieregesondheid van Suid-Afrika en die nasionale Rooivleisprodusente-organisasie (RPO) van Suid-Afrika oor grootskaalse probleme met speenkalfinvoer van Namibië.
Luidens die RPO se jongste nuusbrief, word die kalwers as slagdiere ingevoer maar glo onwettig plaaslik op veilings bemark.
Die kwessies
Die organisasie het verskeie kritieke punte ter tafel gelê wat volgens hom dringende aandag moet geniet. “Hoewel die regte stelsel bestaan om oorgrens-invoer te beheer, het die Nasionale Direktoraat: Dieregesondheid nie genoeg mannekrag beskikbaar om elke vragmotor met vee op die grens te kontroleer nie. Dit is die eerste kritieke punt van beheer,” sê die RPO.
Volgens die RPO is die tweede punt van beheer om seker te maak dat die diere wel by die betrokke slagplaas uitkom. “Vleisinspeksie-owerhede kan moontlik daarmee help. ’n Ander moontlikheid is om diere wat vir slagdoeleindes die land inkom, prominent te brandmerk.” Die vergadering het besluit dat die verskillende provinsies by dié inisiatief betrek moet word.
Grensheinings
Die RPO is bekommerd oor die toestand van grensheinings, veral die heining met Zimbabwe. Diere beweeg glo vryelik oor dié heining wat ernstige siektebedreigings inhou.
Dr. Dewald Keet, waarnemende direkteur van die nasionale Direktoraat Dieregesondheid, sê herstelwerk aan die grensheining aan die ooste- en westekant van Musina gaan binnekort begin, want dit is as ’n voorrangsaak geïdentifiseer. Die Departement van Landbou, Bosbou en Visserye is net verantwoordelik vir die veterinêre heining, terwyl die Weermag en Polisie verantwoordelik is vir die sekuriteit van die land.
Volgens Keet maak ’n tekort aan geld asook die diefstal en vandalisme van die heining dit al hoe moeiliker om veterinêre heinings in stand te hou.
3 Maart 2011
