Danksy die poskantoor se samewerking met die nie-regeringsinstelling Nal’ibali is dit moontlik vir kinders, leesklubs, skole en biblioteke om gratis leesmateriaal by 508 poskantore in Suid-Afrika te kry. Dis ’n reuse-uitbreiding nadat dit ’n jaar gelede by net 46 poskantore beskikbaar was.
Die materiaal is in nege van die elf amptelike tale beskikbaar, wat strook met die doelstellings van internasionale moedertaaldag wat op 21 Februarie gevier word.
“Teen die einde van 2021 kon Nal’ibali elke maand 309 000 leeskoerantjies deur die poskantoor versprei. Elke kopie het drie stories in – dis amper ’n miljoen stories per maand. Ons het 2 279 leesklubs en 216 000 individuele kinders geraak,” sê me. Katie Huston, besturende direkteur by Nal’ibali. “Ons kon dit regkry danksy die poskantoor se netwerk – almal weet daar is ’n poskantoor op elke dorpie.”
Nal’ibali gebruik interaktiewe leeskoerantjies met illustrasies waarin kinders stories in hul moedertaal kan lees. Die koerantjie sal van Maart af ook in ’n tiende taal, Tshivenda, beskikbaar wees.
Navorsing deur Nal’ibali het gevind dat die leeskoerantjies kinders, ouers en onderwysers help om die leesgewoonte te vestig. Ouers en onderwysers het in die navorsing bevestig dat dit die kinders se leesvaardighede ontwikkel, en dit gee ouers en hulle kinders elke maand die geleentheid om gehaltetyd saam deur te bring.
Verdere navorsing dui aan dat kinders wat in hul moedertaal leer lees, hulle eerste skooljare as makliker en lekkerder beleef. Hierdie kinders is ook meer by hul skoolwerk betrokke. Kinders wat gemaklik in hul moedertaal lees, leer vinniger en makliker ’n tweede taal.
Om by Nal’ibali aan te sluit, stuur ’n mens bloot e-pos aan info@nalibali.org, en sluit die volgende in:
- Die naam en poskode van jou plaaslike poskantoor;
- Die naam van jou leesklub, skool of biblioteek;
- ’n Selfoonnommer van die skool, leesklub of die individu wat aansluit. Die poskantoor stuur ’n SMS wanneer die koerantjies afgehaal kan word.
