’n Legende in die wolbedryf, mnr. Jannie Hendriks (83), wat meer as 40 jaar by BKB betrokke was, is onlangs in sy slaap oorlede, vermoedelik weens hartversaking.
Sy seun, Tank, ’n boer en voormalige voorsitter van die Swartwater-boerevereniging, sê sy pa was veral bekend om die wolskole wat hy op verskeie plekke aangebied het. “Hy was altyd gewillig om almal te help en was wyd bekend. Met sy afsterwe het ons meer as duisend boodskappe van medelye gekry. Hy was ook baie lief vir sy Landbouweekblad.
“Hy het skoolgegaan in Dundee en wou graag Glen-landboukollege toe gaan, maar daar was nie geld daarvoor nie. Hy het toe begin om in verskeie provinsies wol te klas. Later het hy by ’n groot boer by Babanango, mnr. Frans Bezuidenhout, gaan werk waar hulle met sowat 30 000 Merino’s en meer as 1 000 Afrikanerbeeste geboer het.
“Bezuidenhout het hom later gehelp om sy eie plaas in die omgewing te koop, maar dit is deur die regering oorgeneem. Hy het toe my oupa se plaas by Dundee gekoop en daar geboer tot hy later die grond verkoop en by BKB begin werk het. Daar het hy die skeerspanne bestuur.”
Hy was egter veral bekend om die wolklaskursusse wat hy op plekke soos Cedara en die Vryheid-landbouskool, asook by dorpe soos Zastron en Christiana aangebied het.
“Selfs in die tyd dat hy by BKB gewerk het, het hy deeltyds geboer en in ’n stadium het hy meer as duisend Dorper-ooie en 700 koeie gehad.” Hy het sy laaste jare as afgetredene op Utrecht deurgebring, waar hy steeds ’n stukkie grond langs die Bloedriviermonument gehuur en beeste en skape aangehou het. Hy word oorleef deur sy vrou, Johanna, en drie seuns, Tank, Sampie en Wesley.
Tank en Sampie was bekend as provinsiale rugbyspelers vir die Luiperds in Potchefstroom. Tank het in 10 toetse vir Rusland gespeel.
