Luidens ’n verklaring van die departement van landbou, grondhervorming en landelike ontwikkeling het monsters van die plaas wat vir laboratoriumtoetse gestuur is, positief vir die H5-stam van voëlgriep getoets. Nagenoeg 300 hoenders het gevrek.
“Met bevestiging dat dit H5 was, is alle voëls in die hokke wat geraak is, onmiddellik van kant gemaak.”
Daar word nog gewag vir die resultate van toetse wat by Onderstepoort uitgevoer is om te bepaal of dit hoogs aansteeklike (HPAI) of minder aansteeklike (LPAI) voëlgriep is, en om die N-tipe van die virus te bepaal.
Die plaas is onder kwarantyn geplaas deur die Gautengse veeartsenyowerheid, wat die oorsaak van die uitbreking ondersoek. ’n Uitbreking van die H5N8-stam, ’n hoogs aansteeklike voëlgriep, is in 2017 op die plaas aangemeld.
Die departement doen ook ondersoek na die vrektes van groot getalle wilde voëls naby Stutterheim in die Oos-Kaap. Toetse wat by hoenders in twee nedersettings naby Stutterheim gedoen is, toon dat newcastlesiekte en voëlgriep nie die oorsaak van die vrektes is nie. Verdere ondersoeke word gedoen. Vrektes van wilde voëls is ook aangemeld in Oos-Londen, Berlin, Gqeberha, St. Francis en Qonce (King William’s Town).
Die departement maan hoenderboere om bedag te wees vir enige tekens van die teenwoordigheid van voëlgriep en om enige vermoedelike gevalle aan te meld by hul naaste staatsveearts.
Van die tekens vir HPAI sluit in:
- Stilte en uiterse depressie.
- Skielike daling in eierproduksie, waarvan baie sagte doppe het of doploos is.
- Kamme en lelle wat rooi en geswel is.
- Swelling van die vel onder die oë.
- Hoes, nies en senuweeagtige tekens.
- Diarree.
- Bloeding op die hakke.
- ’n Paar vrektes kan binne ’n paar dae plaasvind, wat gevolg word deur die spoedige verspreiding van die siekte en vrektes van tot 100% binne 48 uur.
Alle hoenderboere en eienaars van voëls wat as troeteldiere of in dieretuine aangehou word, word aangemoedig om die volgende maatreëls in te stel:
- Hou voëls weg van gebiede waar wilde voëls voorkom.
- Beheer toegang van mense en toerusting na hoenderhokke.
- Moenie water en kos verskaf op maniere waardeur wilde diere aangetrek word nie en hou vrylopende diere onder dak of binne ’n ingeslote area.
- Ontsmet die eiendom, hoenderhokke en toerusting deeglik.
- Vermy die inneem van diere met ’n onbekende siektestatus.
- Meld siektes en vrektes by jou betrokke staats- of private veearts aan.
- Verwyder mis en dooie voëls op ’n veilige manier.
