Die 46-jarige mnr. Willem Grobbelaar van die plaas Touwfontein by Trompsburg is vroeg vanoggend (Woensdag 5 Januarie) in ’n Bloemfonteinse hospitaal oorlede.
Hy het sedert Maart 2020 toe kanker by hom gediagnoseer is, moedig teen die siekte geveg en die dag voor sy dood met ’n “Pa, moenie bekommerd wees nie, ek sal die stryd wen,” mnr. PD Jacobs, sy skoonpa, vertroos.
Grobbelaar was sedert Oktober 2007 Jacobs se regterhand in die Pdrino-Merinostoetery op die buurplaas Vlakfontein. Die tweemanskap het verskeie prestasies met hul fynwolstoetery behaal, onder meer die kroon as Voermol se Skaapboer van die Jaar in 2014 en die Vrystaatse kandidaat vir Landbouskrywers SA se Boer van die Jaar.
Die stoetery het tien keer die Vrystaatse ram van die jaar op Bloemskou opgelewer met Cheetah II as die jongste wenner in 2022.
Grobbelaar het verskeie leiersposisies in die plaaslike boerevereniging, die jongboerkomitee van Vrystaat Landbou en die Merino-ontwikkelingskomitee van streek 3 beklee.
Hy was ’n voorstander van presisieboerdery om meer vleis én wol per hektaar te produseer.
Grobbelaar, ’n boorling van ’n Karakoelplaas by Koës in die suide van Namibië waar sy pa, Johan, nog boer, het aan die Paul Roos-gimnasium op Stellenbosch gematrikuleer. Ná ’n jaar op universiteit het sy loopbaan in 1996 by Spier begin waarna hy twee parstye in Kalifornië was.
Ná sy opleiding op Elsenburg was hy verskeie jare in die Wes-Kaapse wynbedryf betrokke en het ’n volle groeityd in die Kanadese staat Brits-Columbië gewerk.
Voor hy hom in die Suid-Vrystaatse skaapbedryf begeef het, het hy van 2004 tot 2007 as wynmaker en bestuurder van Kleinood op Stellenbosch gewerk. Die Cabernet Sauvignon-garagewyn wat hy in 2009 op Touwfontein van 600 kg Wes-Kaapse druiwe gemaak het, was om die geboorte van sy en sy vrou, Theresa, se eerste dogtertjie, Francine, te vier.
Grobbelaar word deur sy vrou, Theresa, en vier dogters, Francine (13), Grethe (11), Sophia (8) en Stephanie (3) oorleef. Die begrafnisreëlings word nog gefinaliseer.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
