Die Limpopo Dieregesondheidsforum (LDGF) se laaste vergadering op 9 November is deur ’n groot aantal privaat- en staatsveaartse, sowel as verskeie wild- en veeboere bygewoon. Die siektes wat Limpopo, en dus Suid-Afrika (SA), se vee- en wildstapels bedreig is deeglik bespreek.
Die probleme rondom die toetsing van swartwitpense en buffels het veral aandag geniet en ontevredenheid is uitgespreek oor die huidige stelsel, luidens ’n verklaring van die organisasie. “Die rol en funksie van staatsveeartse, verantwoordelikhede van staats- en privaatveeartse in die proses, tydsverloop om toetsresultate beskikbaar te kry, logistieke rompslomp en die onakkurate merk van bloedmonsters is bespreek,” lui die verklaring.
Daar is aangevra dat die oprigting van private toetslaboratoriums ernstig oorweeg word. Kommunikasie met laboratoriums moet egter onmiddelik verbeter en “vee- en wildeienaars sal ’n groter rol moet speel om te verseker dat die totale proses van toetsing van diere volgens die voorskrifte verloop. ’n Groter rol vir privaatveeartse en eienaars van diere is aanbeveel”.
“Veral wildboere lei meermale groot finansiële skade weens onakkurate werk van ander partye. Dit sal in hul eie belang wees om meer intens by die verloop van die hele proses betrokke te raak. Veral deur te verseker dat monsters duidelik en netjies gemerk word, nommers korrek aangeteken word en dat indiening van die monsters bespoedig word.”
Limpopo se grens met buurlande, die merk van vee en skakeling met die Suid-Afrikaanse Polisiediens se wilddiefstaleenhede, asook bek-en-klouseer, brucellose en korridorsiekte was ook onder bespreking.
Veeartse is genooi om na afloop van die vergadering CPD-punte verdien deur middel van verskeie lesings. Dr. Faffa Malan van RuVASA het gepraat oor die bestuur van brucellose en dr. Jacques O’Dell van die Universiteit van Pretoria het siektes wat SA se wild- en veestapels bedreig, bespreek. ’n Lesing oor die sinchronisasie van ovulasie en vaste-periode-kunsmatige inseminasie is deur dr. Danie Odendaal van Veterinarian Network gelewer.
Die LDGF se volgende vergadering vind op 9 Februarie 2017 in Polokwane plaas. Alle veeartse en verteenwoordigers van lewendehawegroepe word genooi om dit by te woon. Kontak me. Wilma Prinsloo by w.prinsloo1@mweb.co.za of mnr. Willem van Jaarsveld by info@agrilimpopo.co.za vir meer inligting. Datums vir volgende jaar se vergaderings is op www.agrilimpopo.co.za te vinde.
Wie is die forum?
Die LDGF is op 12 Februarie 2016 in Polokwane gestig en skakel direk met die Nasionale Dieregsondheidsforum. Die forum se doel is om alle rolspelers wat op enige manier ’n belang by dieregesondheid het, gereeld bymekaar te bring om oor bedreigings, behoeftes en beleid te praat, luidens ’n verklaring van dié organisaie.
Sodoende kan die volhoubaarheid van lewendehaweboerdery verbeter word deur spesifieke fokus op kuddegesondheid en verbruikersbeskerming te plaas. Limpopo grens aan drie buurlande, wat die moontlikheid van die oorgrens-verspreiding van veesiektes na SA wesenlik maak.
“Veeartsenydienste in Limpopo behoort die beste in SA te wees aangesien Limpopo die buffer is vir ’n gesonde nasionale veestapel in SA,” sê dr. Pieter Vervoort, voorsitter van die Nasionale Dieregesondheidsforum.
