Die Landbounavorsingsraad (LNR) se pad het finaal van dié van SA Stamboek geskei.
Werkers het sowat ’n week gelede die rekenaars van die LNR waarop die Intergis-stelsel gehuisves word, uit die SA Stamboek se gebou in Bloemfontein verwyder. Die rekenaarstelsel gaan by die Departement van Landbou se kantoor in Pretoria geïnstalleer word.
Stoetdiere
Die Intergis-stelsel is die rekenaarstelsel waarop die diere van Suid-Afrikaanse stoetboere se geboortes en prestasie die afgelope dekades aangeteken is. Net langs die leë plek waar die LNR se rekenaar gestaan het, pronk die nuwe rekenaars van SA Stamboek waarop ’n kopie van die betrokke programme, wat hy Logix noem, gelaai is.
Op die oog af is dit ’n “skoon” skeiding, maar daar is gerugte dat die staat dalk die eienaarskap en intellektuele eiendom van Intergis gaan betwis. Intergis is gegrond op die Iris-program uit Nederland wat deur plaaslike wetenskaplikes aangepas is vir Suid-Afrikaanse gebruik.
Dr. Pierre van Rooyen, hoofbestuurder van SA Stamboek, sê sake in Bloemfontein gaan soos gewoonlik voort. Vanaf 1 Januarie vanjaar bied dié onderneming ál sy dienste soos voorheen aan met ’n byvoeging van ’n afdeling vir produksie-aantekening onder leiding van dr. Japie van der Westhuizen, voorheen van die LNR.
Genetiese evaluasies
Dié afdeling is by die Universiteit van Pretoria gesetel met vyf kenners, onder wie drie met doktorsgrade, daaraan verbonde. Hulle sal ook nagraadse studente betrek en genetiese evaluasies en teelwaardeontwikkeling doen vir die rasse wat dit wil hê.
Genetiese ontledingsverslae sal vir elke kudde opgestel word. Daarby het hulle nege veldbeamptes in nege streke deur die land wat produksie- en prestasiegegewens vir die vleisbees-, melkbees-, kleinvee- en varkbedryf sal doen. Die diens sal op die plaas gelewer word.
Die Santa Gertrudis-telersgenootskap skakel voortaan by die Breedplan-stelsel in en gaan terselfdertyd die LNR se gesubsidieerde dienste gebruik wat beskikbaar is ingevolge ’n ooreenkoms tussen die twee organisasies.
Dit het nou die weg gebaan vir ander telersgenootskappe om te besluit watter pad hulle wil volg.
7 Februarie 2012
