Hierdie goeie nuus het dr. Shadrack Moephuli, uitvoerende hoof van die LNR, aan die parlement se portefeuljekomitee vir landbou, grondhervorming en landelike ontwikkeling meegedeel.
Die departement van landbou, grondhervorming en landelike ontwikkeling het intussen bekend gemaak dat die toets van die primêre persele waar bek-en-klouseer verlede jaar in die munisipale gebied Molemole in Limpopo uitgebreek het, byna voltooi is en dat sekondêre persele geïdentifiseer vir opvolgtoetse is.
Die uitbreking is verbind met vier veilings op twee persele in September en Oktober verlede jaar. Voorlopige kwarantyn wat as ’n voorsorgmaatreël ingestel is, is opgehef by 127 persele wat met die uitbreking verbind word nadat hulle negatief getoets het.
Die LNR het in 2005 weens tegniese probleme en onvoldoende infrastruktuur opgehou om entstof te vervaardig. Entstof is verkry van die entstofinstituut in Botswana (BVI), wat entstof in die Suider-Afrikaanse Ontwikkelingsgemeenskap (SAOG) lewer. Die LNR stoei al langer as ’n dekade om ’n nuwe entstoffabriek opgerig te kry. In die mediumtermyn-bestedingsraamwerk is R400 miljoen begroot vir die bou en vestiging van sy entstoffabriek. Hier sal ook kliniese eksperimente gedoen word vir die ontwikkeling van ’n breëspektrumentstof vir hartwater, knopvelsiekte, bokpokkies en bokpes.
Gidslaboratorium
Moephuli het gesê 60 000 dosisse entstof is vir elk van die drie stamme van die bek-en-klouseervirus in die gidslaboratorium vervaardig. Die gidslaboratorium is ’n klein laboratorium in die ou gebou wat opgeknap is en waar solank voortgegaan word om die nuwe entstof te vervaardig.
Hy het gesê die entstof is van baie hoë gehalte. “Ons het dit klinies getoets en weet dit is baie doeltreffend. Dit word opgeberg sodat dit beskikbaar is in ’n noodgeval.”
Die LNR was in die proses om ’n projekbestuurder vir die oprigting van die nuwe entstoffabriek aan te stel toe die inperking weens Covid-19 ingestel is. Onderhoude sal waarskynlik in Mei voltooi word. Die direksie van die LNR het onlangs goedgekeur dat ’n projekbestuurder met ervaring van bouwerk en bourekenaarkunde, asook kundiges in argiteksontwerp en die vervaardigingsproses, in pas met die internasionale standaarde vir goeie vervaardigingspraktyk, gewerf moet word.
Die LNR het reeds aangedui dat wanneer hierdie posisies uiteindelik gevul is, sal dit sowat drie jaar duur om die entstoffabriek voltooi. Die ontwerpfase sal sowat 449 dae sal duur, bouwerk 734 dae en bekragtiging sowat 540 dae.
Uitbreking
Sedert die uitbreking verlede jaar het 19 persele positief vir bek-en-klouseer getoets. Die jongste positiewe perseel is op 26 Februarie vanjaar by die internasionale organisasie vir dieregesondheid (OIE) aangemeld en geen nuwe positiewe persele is sederdien geïdentifiseer nie. Kwarantyn is by drie persele opgehef en 16 eiendomme is steeds onder kwarantyn. Die departement het aan agt besmette voerkrale toestemming verleen om diere te slag by twee aangewese abbatoirs. Meer as 9 000 diere van plase wat onder kwarantyn is, is geslag. Wanneer al die diere op die besmette persele geslag is, kan die kwarantyn opgehef word.
Die departement het ook aangedui dat handel in beesvleis met die meeste handelsvennote, insluitend Swaziland, hervat is.
Landbouweekblad is steeds beskikbaar op winkelrakke, terwyl sake by https://t.co/J5CsarOmv3 en @landbouweekliks vlot verloop. Lees hier wat jou te doen staan indien jy sukkel om die tydskrif in die hande te kry én hoe jy digitaal kan lees. https://t.co/Ug6tJEMNfl
— landbou.com (@landbou) May 12, 2020
