Dr. Litha Magingxa is met ingang 1 April vanjaar as uitvoerende hoof van die Landbounavorsingsraad (LNR) aangestel. Sy aanstelling is einde Januarie deur die kabinet goedgekeur.
Maginxa, ’n landbou-ekonoom, het al voorheen by die LNR gewerk. Hy is tans uitvoerende bestuurder van landbou-ekonomie en adviesdienste by die Land Bank, waar hy sedert 2018 werk, maar hy het ook van 2009 tot 2014 by die bank gewerk.
Magingxa neem tans waar as die bank se uitvoerende bestuurder van strategie en kommunikasie.
By die LNR sal hy dr. Shadrack Moephuli opvolg, wat einde Julie verlede jaar as uitvoerende hoof uitgetree het ná bykans 15 jaar.
Magingxa was van 2014 tot 2018 groephoof van landbou-ekonomie en kapasiteitsontwikkeling by die LNR en van 2005 tot 2007 ’n navorser in landbou-ekonomie by die instelling.
In sy loopbaan was hy onder meer ook betrokke by die raadplegende groep vir internasionale landbounavorsing (CGIAR) en die instituut vir internasionale waterbestuur (IWMI).
Hy is tans lid van die instituut van direkteure in Suider-Afrika en was van 2011 tot 2017 ’n lid van die direksie van die Nasionale Landboubemarkingsraad.
Magingxa is ’n voormalige voorsitter van die landbou-ekonomievereniging van Suid-Afrika.
