'n Landboubedryf wat nie swart boere bemagtig, voedselsekuriteit bevorder en werksgeleenthede skep nie, sit die pot geheel en al mis, het mnr. Aggrey Mahanjana, sekretaris-generaal van die African Farmers’ Association of South Africa (Afasa), by Agri SA se bedryfskonferensie gesê.
Mahanjana het tydens 'n paneelbespreking oor die finansiering vir landbou-ontwikkeling gesê dié drie faktore behoort die dryfveer vir belegging te wees maar dat verskeie komplikasies vordering kortwiek.
Waar is die geld?
Volgens Mahanjana het die Regering kwansuis miljarde in die landbou belê, wat geen naspeurbare impak op die bedryf gemaak het nie. "Jy sal nie dié geld kry as jy daarna soek nie. Jy kan dit nie sien in die bedryf nie!"
Die Regering is egter nie die enigste sondebok nie, sê Mahanjana. Hy beskuldig die private sektor daarvan dat hulle die Regering om die bos lei om finansiering te bekom en dié fondse dan vir hulle eie doeleindes aanwend.
"Almal wil hulle hand in die beursie druk. Mense weet daar is geld by die Regering en almal soek 'n deel daarvan.
"Sommige projekte word ook aangepak ter wille van swart ekonomiese bemagtigingsteikens en nie om enigiemand as sulks te ontwikkel nie. Dié sektor kan nie ontwikkel word as dié tipe optrede voortduur nie," sê Mahanjana.
Oplossings
Ten spyte van beide die private sektor én die Regering se tekortkominge, is dit noodsaaklik dat dié twee hande vat om saam die bedryf te ontwikkel.
"Ons kan nie landbou-ontwikkeling na behore finansier sonder openbare en private vennootskappe nie. Die Regering sal met die private sektor moet saamwerk om sukses te behaal, want die Regering het nie die kapasiteit wat betref hulpbronne en tegnologie om dit alleen te doen nie."
Die skep van 'n boere-register sal bemagtigingspogings ondersteun, sodat hulp en fondse op 'n effektiewe en gepaste manier verskaf kan word.
"Indien jy net geld in die rigting van enige swart boer gooi, sal jy alles verloor. Ons moet weet met wie ons te doen het, in watter fase van sy besigheid die boer tans is, wat sy spesifieke behoeftes is en waarheen hy graag sy boerdery wil neem."
Mahanjane voer aan dat belegging gemaak moet word met die kommersialisering van boere as mikpunt en dat bestaansboere nie die teiken van belegging behoort te wees nie.
"Jy mors jou geld indien jy belê in bestaansboere en nie in 'n boer wat in die toekoms kan bydra tot ekonomiese ontwikkeling nie. Dit is soos om water in 'n emmer vol gate in te gooi," sê hy.
