Gumede glo die pad vorentoe vir die landbou in Suid-Afrika is een waarop alle belanghebbendes saam in dieselfde rigting beweeg. “Ek glo daar is ’n toekoms vir ons almal in die landbou. Die produsente, koöperasies, werkerunies, plaaslike en nasionale regering moet almal saamwerk om praktiese oplossings te vind vir die talle probleme wat die sektor in die gesig staar.”
Gumede, wat op sy pa se plaas van 6 ha op die Makhathinivlakte grootgeword het, het die plaas sedertdien tot ’n katoenboerdery op 150 ha uitgebrei. Hy was sedert 2005 visevoorsitter van Kwanalu en is sedert 2013 visepresident van Agri SA.
Mnr. PJ Hassard, ’n beesboer van Hluhluwe, is verkies tot visevoorsitter van Kwanalu. Die uittredende voorsitter, mnr. Andy Buchan, sal aanbly as die tweede visevoorsitter van Kwanalu.
Me. Sandy la Marque, uitvoerende hoof van Kwanalu, meen die organisasie is bevoorreg om ’n leier soos Gumede aan die stuur te hê.
“In die jare wat hy op die raad van Kwanalu gedien het, het hy ’n nugtere logika na die tafel gebring. Hy verstaan boere se probleme en is ’n bekende leier in die bedryf.”
Gumede dien in talle rade in die landboubedryf, onder meer as die visevoorsitter van Katoen Suid-Afrika en as ’n raadslid van die Suid-Afrikaanse Katoenprodusente-vereniging. Hy is ook sedert 2010 die besturende direkteur van die Makhathini-katoenmeul. Buiten die 150 ha waarop hy self boer, huur hy ’n verdere 250 ha waarop hy met katoen en wintergroente boer.
