Vrystaat Landbou het tydens ’n vergadering van sy uitvoerende bestuur opgemerk dat ’n seisoen van ‘maklike’ leierskap in Suid-Afrika, asook in die georganiseerde landbou, tans posvat.
Mnr. Dan Kriek, voorsitter van Vrystaat Landbou, sê in ’n nuusverklaring “dié leierskap gebruik eenvoudige elemente om mense bang te praat, en om nie ten volle die waarheid te deel nie, terwyl hulle geen werkbare oplossings bring nie. Hierdie vorme van “maklike” leierskap wil te kenne gee dat Vrystaat Landbou nie ten volle bewus is van wat wetgewing wat in terme van die landbou ontwikkel is – en moontlik ’n impak kan hê op eiendomsreg – inhou nie, of iets konstruktief doen of strategieë het om dit teen te werk nie.”
Kriek sê Vrystaat Landbou is sedert 2003 besig om ’n volledige plan vir grondhervorming te ontwikkel, wat al op verskeie geleenthede aan die provinsiale en nasionale regering voorgelê is. Dit is ook deur mnr. Louw Steytler, voormalige voorsitter van Vrystaat Landbou, aan oud-pres. Thabo Mbeki voorgelê.
“Ondersteunend hiertoe het ons in samewerking met die provinsiale departement van grondhervorming en landelike ontwikkeling ’n grondoudit saamgestel, wat verlede jaar tydens die kongres ter tafel gelê is. Met dié stap het ons onsself as eerlike en ernstige rolspelers oor grondhervorming gevestig. Ons bona fides kan nie betwyfel word nie,” sê Kriek.
Die organisasie se plan is gebaseer op ekonomiese en grondwetlike werklikhede. Vrystaat Landbou wil dit duidelik stel dat hy geen alternatiewe plan (vrywillig of nie) sal steun indien dit nie op ekonomiese en grondwetlike bene kan staan nie. “Ons sal ons rol ten volle vervul in die proses van skakeling met die Departement van Grondhervorming en Landelike Ontwikkeling, en werkbare oplossings daarstel op provinsiale en nasionale vlak.
“Verder sal ons voortgaan om ons landbou-ondernemings en bedryfsorganisasies te ondersteun met hul planne wat reeds suksesvol is. Vrystaat Landbou wil hê dit moet duidelik wees dat ons enige wetgewing wat nie die toets van grondwetlikheid slaag nie, tot in die Grondwethof sal uitdaag.”
Kriek het al die lede van Vrystaat Landbou na die organisasie se kongres op 6 en 7 Augustus 2014 in Bloemfontein genooi. Die tema van die Kongres is Leierskap deur Landbou.
