Die kombinasie van mnre. Senzeni Zokwana en Bheki Cele as die Minister en adjunkminister van Landbou, Bosbou en Visserye, dui daarop dat die landbou nou in krisis is, sê mnr. Julius Malema, leier van die EFF.
Malema het sy parlementêre span Sondag bekendgemaak.
“Komaan, hy (Zokwana) is onbevoeg en ‘n lopende ramp. Verbeel jou hy en Bheki Cele in die landbou. Wat gaan hulle doen? Cele gaan die visse doodskiet.
Malema sê pres. Jacob Zuma het Zokwana beloon omdat hy gedurende die kwessie van Brett Murray se kunswerk “The Spear” gedreig het om kaal die strate in te vaar. “The Spear” is ’n afbeelding van Zuma as Lenin met geslagsdele wat uithang. “Hy (Zokwana) het sy vermoë gedemonstreer om naak te loop en daarvoor is hy vergoed.
“Die land het ‘n grap geword. As jy ‘n posisie in die Kabinet wil hê, moet jy dreig om kaal te loop.”
Malema sê ook dat die feit dat Zokwana sy 21-jarige beeswagter net R26 per dag betaal, toon dat hy nie die belang van die werkersklas op die hart nie. City Press berig dat mnr. Vuyolwethu Ndabambi elke dag van die week werk en slegs R26 per dag verdien.
Malema sê Zokwana het sy vakbond, die National Union of Mineworkers, maklik gelos vir die parlementêre luukshede.
Rakende die Onteieningswet hoop hy dat dit weer na die Parlement sal kom. “Ons sal daarvoor stem. Ons soek onteiening sonder vergoeding. Indien die ANC ‘n mosie uitbring oor die onteiening van gesteelde grond, dan sal ons daarvoor stem.
“Dit is wie ons is. Ons is nie soos die DA wat net opponeer ter wille daarvan om te opponeer nie,” sê Malema.
Malema sal die EFF in die portefeuljekomitee vir minerale hulpbronne verteenwoordig, mnr. Andile Mngxitama in landelike ontwikkeling en grondhervorming en mnr. Modikela Mathlokoin die komitee vir landbou, bosbou en visserye.
