Suid-Afrikaners moet hulle afkeur teenoor sekere vryheidsliedere duidelik maak, sê dr. Pieter Mulder, leier van die Vryheidsfront Plus en adjunk-minister van Landbou, Bosbou en Visserye.
Dít volg na mnr. Julius Malema, leier van die ANC-jeugliga, Woensdag (26 Januarie) ‘n beroep op sy medepartylede gedoen het om dié liedere te ondersteun.
“Malema het gister (26 Januarie) ’n beroep gedoen op alle ANC-veterane en aktiviste ‘om hulle stem dik te maak teen pogings om vryheidsliedere te verbied’,” lui ‘n verklaring van Mulder.
Moontlike lewensverlies
Volgens Mulder toon Malema duidelik geen begrip vir die ingewikkelde samestelling van die Suid-Afrikaanse samelewing nie, want in ‘n land waar boere weekliks aangeval of vermoor word, is ‘n lied soos “skiet die boer” nie aanvaarbaar nie.
Mulder sê die party sal voortgaan met regsake en ander stappe om die frase “skiet die boer” of “Ibhunu” as haatspraak verklaar te kry.
“Laat ons ’n les leer uit die onlangse gebeure in die VSA waar ’n individuele kongreslid Gabrielle Griffords geskiet het omdat hy die woedende woordestryd tussen die Republikeine en Demokrate letterlik opgeneem het. Waarom word net aanvaar dat die “skiet die boer”-frase nie letterlik opgeneem word deur ’n nuwe geslag jongmense wat nie deel van die ANC se “struggle” was nie en daarna gebore is?” vra Mulder.
27 Januarie 2011
