’n Uitbreking van Bruselose Melitensis (Maltakoors) is onlangs onder ’n trop bokke in Gauteng gediagnoseer met twee bevestigde menslike gevalle, sê die Rooivleisprodusente-organisasie (RPO).
Luidens die organisasie se jongste nuusbrief is staatsveeartse op ’n gereedheidsgrondslag geplaas en moet hulle enige verdagte gevalle aanmeld. Die organisasie sê hulle weet tans slegs van die een geval.
Die Departement van Landbou, Bosbou en Visserye sal geld beskikbaar stel vir diagnostiese koste mits die bloedmonsters deur ’n staatsveearts ingedien word.
Aborsies by kleinvee
Volgens die nuusbrief veroorsaak die virus aborsies onder bokke en skape. In sommige gevalle kan dit ook lei tot aborsies by koeie, en dié virus kan ook voorkom in van dié koeie se melk.
Een van die bekendste kliniese simptome is massa-aborsies tydens laat dragtigheid onder ’n trop skape of bokke. Van die diere word ook sieklik gebore. Mense ervaar verkoue of malaria-verwante simptome nadat hulle met besmette diere of fetusse in aanraking was.
Oordrag
Die siekte word oorgedra deurdat ’n dier of mens met ’n besmette fetus of die liggaamvloeistof van ’n besmette dier in aanraking kom. Dit word ook oorgedra wanneer die melk of ander produkte van ’n besmette dier ingeneem word.
3 Maart 2011
