‘n Man wat boere van Mpumalanga by ‘n kragslenter betrek het wat Eskom sowat ‘n miljoen rand gekos het, is aan 28 klagte skuldig bevind.
Mondo Viljoen is op 24 Oktober in die Lydenburgse landdroshof skuldig bevind op nege klagte van bedrog, nog nege van sameswering en tien van kwaadwillige beskadiging van eiendom.
Operasie Khanyisa, ‘n vennootskapsveldtog om wettige, veilige en doeltreffende kraggebruik te bevorder, het in ‘n verklaring gesê Viljoen het in Maart vanjaar in die hof verskyn op klagte wat daarmee verband gehou het dat hy sogenaamde elektrisiteitsdienste aan agt boere gelewer het, wat peutering met meters en omleiding behels het.
Sy medepligtige en die boere het staatsgetuies geword en teen hom getuig. Hulle is van verdere vervolging gevrywaar omdat hul getuienis geloofwaardig bevind is, sê Operasie Khaniysa.
Die boere het die geld terugbetaal wat hulle aan Eskom geskuld het.
Operasie Khaniysa sê verder Viljoen het nie vir die uitspraak in die saak opgedaag nie en het sy regsverteenwoordiger per teksboodskap laat weet dat hy nie daar sou wees nie.
Hy het op twee vorige hofdatums, toe die saak uitgestel is, ook nie opgedaag nie. ‘n Lasbrief is nou vir sy inhegtenisneming uitgereik.
