Mashatile
het Donderdag sy eerste vraag-en-antwoordsessie in die parlement gehad. Dié
sessie is met bykans ’n uur vertraag nadat rook brandalarms in die
Kaapstad-stadsaal laat afgaan het.
Tydens die sessie het hy onder meer gesê die regering sal voortgaan om grondhervorming te bespoedig. “Baie werk is al in hierdie verband gedoen, maar baie meer moet nog gebeur om seker te maak ons mense in landelike gebiede pluk ook die vrugte van ekonomiese voordele danksy ons land se demokrasie.”
Hy het melding gemaak van verskeie projekte wat konsentreer op infrastruktuur wat die regering reeds in landelike gebiede begin het. “Van die projekte sluit in besproeiingskemas en infrastruktuur wat meganisasie bevorder, die oprig en verbetering van onder meer agriparke, diereklinieke, boorgate, diptenke, omheinings en hulp aan bestaansboere.”
Volgens hom het 107 bestaansboere reeds geregistreer vir die koeponstelsel van die staat om hierdie boere te help om voer vir hul diere te koop en gewasse te kweek.
Samewerking met tradisionele leiers
Mashatile het ook onderneem dat die regering pogings sal aanwend om die verhoudings en vennootskappe met tradisionele leiers te versterk en meer te gesels oor veral die verdeling daarvan.
“Ons sal verskeie kwessies tydens opkomende vergaderings met tradisionele leiers bespreek,” het hy gesê. “Ons wil seker maak ons mense kry toegang tot grond sodat hulle kan boer en hierdie verbintenis is nie net rondgooi van slagspreuke nie.”
Hy het ook genoem die departement van landbou, grondhervorming en landelike ontwikkeling het met die proses begin om die beleid oor gemeenskaplike grond saam te stel wat onder meer kwessies soos eienaarskap sal aanpak.
Jagersfontein se waterkrisis
Mashatile moes ook bontstaan om vrae oor die Jagersfontein-ramp te beantwoord, veral in die lig van Bloemwater se besluit om toevoer tot al nege dorpe in die munisipale gebied Kopanong se watervoorsiening tot 30% te beperk.
Me. Heloise Denner van die Vryheidsfront het Mashatile het onder meer gevra wat die regering doen om die agterstallige skuld van ongeveer R600 miljoen wat die Kopanong aan Bloemwater skuld, aan te pak.
“Weens wanbetaling van uitstaande skuld wat die munisipaliteit aan Bloemwater skuld en geen realistiese plan op die tafel om die skuld aan te pak nie, het Bloemwater besluit om die watertoevoer in te perk. Ons bly verbind om in hierdie verband tot die saak toe te tree om die probleem op te los,” was Mashatile se antwoord.
Denner wou ook weet wat die regering se planne ten opsigte van verdere hulpverlening aan Jagersfontein is ná die slikramp verlede jaar. Die dorp is ook deel van die Kopanong.
“Kopanong het al vir sewe jaar vóór die ramp gesukkel met watertoevoer. Wat gaan die regering doen om te help om die perk op 30% deur Bloemwater te verlig? Die mense van Kopanong het dringend water nodig,” het sy gesê.
Volgens Mashatile is ’n taakspan onderweg, of reeds op Jagersfontein, om van hierdie kwessies te ondersoek. “Hierdie span moet probleme ondersoek en oplossings vind voordat ekself die gebied gaan besoek. Ons soek oplossings voordat ek gaan, ek gaan nie soontoe op ’n imbizo nie, ek wil gaan omdat die president opdrag gegee het dat verskeie brandpunt-munisipaliteite besoek moet word en oplossings vir probleme gevind word.”
Hy het bevestig Jagersfontein en Kopanong is deel van die landelike dorpe en plaaslike munisipaliteite wat as brandpunte van swak dienslewering geïdentifiseer is.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
