Die middel teen kriptosporidiose waarvoor registrasie in Suid-Afrika tans hangende is, sal ten beste beperkte beskerming bied en kan nie gesien word as ’n vervanging vir goeie biosekerheid op plase nie.
Die dieregesondheidsmaatskappy MSD Animal Health wag tans op die registrasie van sy behandelingsmiddel teen kriptosporidiose, wat tans in die buiteland te kry is, kragtens die Wet op Medisyne en Verwante Stowwe (Wet 101 van 1965).
Slegs by jou veearts
Volgens dr. Chriché du Plessis, bemarkingsbestuurder vir herkouers by MSD Animal Health, sal dié middel, soos enige ander geskeduleerde medikasie, kragtens die betrokke wetgewing nie regstreeks aan die publiek bemark mag word nie.
“Dit sal slegs op voorskrif by ’n veearts beskikbaar wees,” sê sy. Hierdie tipe registrasie beteken boere sal oor ’n hele paar hekkies moet spring om behandeling vir hul diere te kry.
“Die middel is slegs ’n behandeling en nie voorkomend nie. Die produk is ook tans slegs in die buiteland geregistreer vir gebruik by beeste.
“Boere wat probleme met diarree en diarree-verwante vrektes by hul diere het, sal dus ’n veearts na hul plaas moet laat kom, of ’n karkas na ’n veearts moet neem vir ’n nadoodse ondersoek, wat die ontleding van ’n mismonster moet insluit.
“Wanneer kriptosporidiose gediagnoseer word, kan die veearts die produk voorskryf en sal alle diere wat tekens van die siekte toon, behandel kan word,” sê Du Plessis.
Nié vir e. coli
Sy benadruk ook dat die produk slegs vir die behandeling van kriptosporidiose is en nie vir Escherichia coli nie. Die enigste voorkomingsmaatreël vir eersgenoemde is goeie bestuursmaatreëls, soos watergehalte en -higiëne.
Dit is moontlik om diere voorkomend teen E. coli in te ent en ook om die siekte met antibiotika te behandel. “Weens die gifstowwe wat E. coli vervaardig, werk antibiotika nie altyd nie en vrek die lammers of kalwers steeds. Dus is bestuur baie belangrik,” sê sy.
Landbouweekblad het vroeër berig dat vrektes weens kriptosporidiose en E. coli waarskynlik weer in die volgende kalftyd tydens Augustus en September sal uitbreek. Boere moet dus dringend hul biobeheermaatreëls opskerp.
