Dis egter nie net kommersiële vee wat doodgebrand het nie, maar ook verskillende vorme wild wat natuurlik in die distrik voorkom.
Mnr. Johann Breytenbach, hoofbestuurder van die Vrystaatse sambreel-organisasie vir brandverenigings, sê die Dierebeskermingsvereniging (DBV) het ’n tydelik skuiling in die gebied opgerig om te help met diere wat in die brande beseer is. “Beseerde skilpaaie wat in die veld gevind word, word na die DBV toe gebring. Drie skilpaaie moes al van kant gemaak word. Dié brand het nie net skade vir boere veroorsaak nie, maar ook ekologiese skade tot gevolg gehad.”
Na verwagting het tussen 20 000 ha en 30 000 ha in die slag gebly weens die brande. Breytenbach sê ’n forensiese ondersoekspan ondersoek tans die gebied om die oorsaak van die brand te bepaal. Daar is bewerings dat die brand die gevolg was van ’n kragpaal wat gebreek en die veld aan die brand gesteek het.
Die brand het op Donderdag 15 November omstreeks 12:00 ontstaan. Dit was teen die einde van die dag onder beheer. Dié brand het op Vrydag 16 November weer opgevlam. Teen Saterdag om 04:00 was dit onder beheer.
Boere ry 120 km ver
Boere in die Suid-Vrystaat het tot 120 km ver gery om die brande te help blus. “Hier was meer as 100 bakkies en seker 400 mense wat kom help het. Ons is ongelooflik dankbaar,” sê mnr. Herman Archer, ’n boer van die omgewing. Al sy weiding het Vrydagnag afgebrand.
Volgens Breytenbach kom brande die afgelope weke gereeld reg oor die provinsie voor, met sommige brande wat vinniger onder beheer gebring kan word as ander, veral omdat die droogtetoestande oor die provinsie verskil. Hy maan dat toestande wat ’n hoë brandgevaar inhou, sal heers totdat goeie reën (meer as 25 mm) oor groot dele van die provinsie voorkom.
Landelike gemeenskappe word gevolglik gemaan om paraat te wees vir enige moontlike brandgevaar. Breytenbach versoek lede van die publiek om nie oop vure te maak wat moeilik beheerbaar is nie. Voertuigbestuurders word gevra om nie sigaretstompies langs paaie uit te gooi nie, want ’n brandende stompie kan groot skade aanrig en mens en dier bedreig as dit ’n veldbrand veroorsaak.
Vrystaat Landbou (VL) het ’n ondersteuningsnetwerk gevestig vir die boere wat hul weiding en voer vir hul vee, asook hul vee verloor het. Enigeen wat die boere wil bystaan, word versoek om die organisasie te kontak. Volgens inligting op VL se Facebookblad is die grootste behoefte voer of geld vir die vervoer van voer. Belangstellendes kan ook die webwerf Vriende van Landbou by http://www.vlvriende.org/ besoek vir nog inligting of verwysings.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
