Hoewel die wêreld tans groot pogings aanwend om koolsuurgasvrystellings te beperk, is ’n reuse-styging in die vrystelling van koolsuurgas aangeteken.
Luidens ’n berig van Associated Press, sê Amerika se Departement van Energie dat syfers vir 2010 wys dat die vrystelling van kweekhuisgasse met 6% toegeneem het. Dít word beskryf as die grootste toename tot nog toe.
Altesaam 564 miljoen ton koolsuurgas is verlede jaar in die atmosfeer vrygelaat. Amerika, China en Indië is geïdentifiseer as die drie lande wat die meeste hiertoe bygedra het. Dié vrystellings is hoër as die slegste moontlike scenario waarna wetenskaplikes vier jaar gelede verwys het.
Meer praat, meer groei
Mnr. John Reilly, die koördineerder van die Massachusetts-instituut vir Tegnologie se gesamentlike program oor wetenskap en die beleid van globale verandering, sê: “Hoe meer ons praat oor hoe nodig dit is om die vrystelling van koolsuurgas te beheer, hoe meer neem dit toe.”
Verskeie wetenskaplikes het hul teleurstelling oor dié styging uitgespreek en opgemerk dat die wêreldbevolking tans sy kinders se toekoms in gevaar stel.
Bereik ontwikkelende lande
Volgens Reilly, en mnr. Andrew Weaver, ’n klimaatwetenskaplike van die Universiteit van Victoria, het die syfers egter aangedui dat ontwikkelde lande – behalwe Amerika – hul koolsuurgasvrystelling met 8% teenoor hul syfers vir 1990 verlaag het.
Weaver sê derhalwe moet ontwikkelende lande nou groter aandag geniet: “Ons het regtig nodig om die ontwikkelende wêreld te bereik, want as ons dit nie doen nie, gaan die probleem buite beheer raak. En die probleem is baie naby aan die punt om buite beheer te raak.”
Bron: Associated Press
7 November 2011
