Katoen SA se sesde produksieskatting vir die 2013/14-jaar dui op 'n totale katoen-oes van 48 346 bale vesel, 'n styging van 1% teenoor verlede maand se skatting.
Volgens mnr. Hennie Bruwer, uitvoerende hoof van Katoen SA, sal 43 495 bale geproduseer word van Suid-Afrikaans geproduseerde katoenpluksel, ’n styging van 68% teenoor die vorige seisoen. Die balans van 4 500 bale vesel het betrekking op die verwagte produksie wat deur die Swazilandse pluismeule gepluis sal word.
Op internasionale vlak word steeds druk op die wêreld-katoenprys ondervind weens die toenemende voorraadhouding buite China tesame met verminderde invoer na dié verbruikersland.
Volgens ’n verslag van Katoen SA het die Cotlook A-indeks, ’n aanwyser van internasionale katoenpryse, wat vanjaar op 26 Maart ’n hoogtepunt van bykans 99 Amerikaanse sent/lb bereik het, nou teruggesak tot 87 VSA c/lb.
Volgens die internasionale advieskomitee sal die wêreld-katoenhandel in 2014/15 met 8% afneem, grootliks weens ’n verwagte afname in Chinese katoeninvoer van 1.2 miljoen ton.
China se katoenproduksie vir 2014/15 word op 6 miljoen ton geraam, die laagste vlak in 11 jaar. In China word geraam dat die katoenverbruik vir 2013/14 die laagste in tien jaar sal wees. Volgens die komitee is dit weens die hoë prys van plaaslike Chinese katoen, invoerbeperkings, finansieringsprobleme en die swak vraag na katoengare.
