Suid-Afrika se koringboere beoog om in die komende seisoen meer te plant as verlede jaar, toe die nasionale oppervlakte onder koring op sy laagste punt sedert die vroeë 1900’s was.
Die Nasionale Oesskattingskomitee sê vroeë aanduidings is dat boere 598 500 ha koring wil plant – hoofsaaklik danksy ’n beter koringprys as verlede jaar hierdie tyd. Dié hektare is sowat 7% meer as verlede jaar, maar steeds die naaskleinste oppervlakte onder koring in meer as ’n eeu.
Die grootste verwagte toename in aanplantings is in die Vrystaat, waar boere aangedui het hulle wil 220 000 ha, amper 8% meer as verlede jaar, plant. Wes-Kaapse boere beplan 274 000 ha en Noord-Kaapse boere 44 000 ha koring.
Dít kom te midde van koringpryse wat internasionaal stewig styg vanweë kommer oor droogte wat winterkoring in talle van die wêreld se belangrike produksiestreke knou. Koel en nat reënweer elders kan lentekoring-aanplantings vertraag.
Die Safex-koringprys het die afgelope jaar met 27% gestyg en is steeds in navolging van wêreldpryse op pad boontoe.
3 Mei 2011
