Om winsgewind te bly te midde van stygende produksie koste het boere nodig om aan die voorpunt van tegnologiese ontwikkeling te wees. Mnr. Rossouw Cillié, 2013 se Boer van die Jaar, het by die Rovic Leers-opleidingsdag in Somerset Wes gesê hierdie situasie gaan ’n groot rol speel in hoe boere sake doen.
“Ek sien konsultante as vennote in my sake-onderneming. As ek geld maak, maak hulle geld. Ek wil dus hê dat verkoopskonsultante met my oop kaarte moet speel oor hulle produkte. Hulle moet ’n gedetailleerde objektiewe vergelyking van hul produk met dié van hulle mededinger kan maak, sodat ek ’n goed ingeligte besluit kan neem.”
Hy het gekla oor hoe min waarde daar deesdae aan integriteit geheg word. “In die verlede was iemand se woord genoeg versekering dat iets gaan gebeur, deesdae moet alles mos op papier geformuleer word. Integriteit is egter vir my ononderhandelbaar – ek kan nie werk met iemand wat ek nie kan vertrou nie.”
Sy raad was dus dat verkoopsagente hulself eers moet verkoop, die produk sal dan volg: “Ek doen die meeste van my sake met die mens by wie ek persoonlike aanklank vind en met hom is ek bereid om ’n pad te loop,” het hy verduidelik.
Sake-entiteite
Hy het gesê dat stygende lone veroorsaak het dat boere van werkgewers na sake-entiteite verander het. Konsultante moet dus probeer om die werklike behoefte van boere in hierdie situasie te verstaan en nie hulle – wat nog nooit geboer het – se idees op boere probeer afdwing nie. Inligting en oplossings moet ook eenvoudig en prakties wees, aangesien boere in Suid-Afrika nog nie die kennis het om die ingewikkelde goed te doen wat oorsee gedoen word om kostes te spaar nie.
Cillié het met behulp van meganisasie en klein produksieveranderings dit reggekry om sedert die stakings 18 000 mandae te meganiseer. Dit is gelyk aan sowat honderd werksgeleenthede. Oor die algemeen het hy egter dit reggekry om afdankings tot die minimum te beperk deur werkers se produksie te verbeter met behulp van meganisasie.
Volgens sy berekeninge kan jy R130 000 belê in meganisasie oor vyf jaar, vir elke werker wat moet gaan. Die masjien behoort homself binne drie jaar af te betaal. “Mense het nooit voorheen hierdie somme gemaak nie, maar nou word dit al hoe meer gemaak en meganisasie word ’n al hoe aantrekliker opsie.”
Hy het egter gewaarsku dat boere nie moet op loop gaan met meganisasie nie. “Party boere het mos die geneigdheid om altyd na 'n trekker te gryp as probleme kom. Die manier waarop meganisasie gedoen word, moet goed deurdink word om te verseker dit voeg waarde tot jou boerdery.”
Byskrif: Mnre. Marius Ras, bemarkingsbestuurder by Rovic Leers (links) en Dominique Nicola, bestuurder van Uitvoere na Afrika by Kuhn-groep, het aangekondig dat hulle 'n reis vir mnr. Rossouw Cillié (middel) na die Kuhn-groep se hoofkantoor in Frankryk borg omdat hy die Boer van die Jaar-kompetisie gewen het. Cillié boer by Laastedrif buite Ceres. Foto: GLENNEIS KRIEL
