Hulle het egter 3,2% minder vars melk gekoop, en albei produkte se kleinhandelprys het gedaal.
Luidens die Suid-Afrikaanse Melkprosesseerdersorganisasie (Sampro) se jongste verslag oor belangrike markaanduiders in die suiwelbedryf wys die onderneming Nielsen se opnames dat die gemiddelde prys van langlewemelk in dié tydperk met 3,5% gedaal het en dié van vars melk met 0,8%.
Mnr. Alwyn Kraamwinkel, uitvoerende hoof van Sampro, sê in die verslag die totale verkope van onversoete en ongegeurde melk (waaronder vars én langlewemelk) was na raming 4,3% hoër as in die vorige twaalf maande.
Benewens vars melk het die vraag na verskeie ander melkprodukte ook gedaal, naamlik jogurt (-1,8%), roomkaas (-8,8%), room (-0,9%) en botter (-4,7%).
Slegs die vraag na langlewemelk, gegeurde melk (1,3%), maas (8,8%) en voorafverpakte kaas (9,7%) het gestyg.
Botter
’n Paar produkte se pryse het gestyg, met die styging van 20,8% in die botterprys ’n uitskieter.
Kraamwinkel sê wêreldwyd word die voedingswaarde en smaak van volroomprodukte toenemend erken. Die gevolg is dat daar minder bottervet beskikbaar is waarmee botter gemaak kan word.
Die internasionale prys van botter het daarom ook meer gestyg as dié van ander produkte.
Die Suid-Afrikaanse produkte, benewens botter, waarvan die kleinhandelprys gestyg het, is gegeurde melk (2,5%), jogurt (2,8%), roomkaas (3,6%) en room (9,7%).
Kraamwinkel sê die belangrikste eienskappe van die plaaslike melkbedryf is steeds, soos in die vorige drie kwartaallikse Sampro-verslae beskryf, hoër produksie van onverwerkte melk en melkprodukte, ’n swak vraag na produkte weens swak ekonomiese groei, afwaartse druk op die prys van onverwerkte melk en melkprodukte, en groter invoer van melkprodukte.
Minder invoer?
As die hoeveelhede wat in die eerste ses maande van die jaar in- en uitgevoer is, in die res van die jaar op dieselfde vlakke bly, sê Kraamwinkel dat daar vanjaar minder produkte in die kategorie “melk en room” ingevoer behoort te word as verlede jaar, maar meer in ál die ander kategorieë.
Wat uitvoer betref, kan slegs die uitvoer van botter en kaas vanjaar meer wees as verlede jaar.
Kraamwinkel sê egter dat dit net ’n beraming is, wat nog baie kan verander. In Junie vanjaar, byvoorbeeld, is daar wat gewig betref in alle kategorieë minder produkte ingevoer as in Januarie.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
