Coetzee was ’n spreker by die MPO se jaarkongres in Jeffreysbaai.
Hy sê die pryse van produksiemiddele neem tans vinniger toe as produsentepryse, ook op internasionale vlak.
“As jy vanjaar dieselfde produksie lewer, is jou inkomste nou minder as ’n jaar gelede.”
Hy sê melkboere moet dus meer produseer om hul verlangde inkomste teen die kwynende marges te kan behaal.
Verwerkers en vervoerders verkies weens kostedoeltreffendheid eerder groter produsente. Betroubare verwerkers betaal boere met ’n bogemiddelde daaglikse produksie meer en daarom sal klein boere dit moeiliker vind om betroubare kopers te kry.
Coetzee stel voor dat boere moderne tegnologie in hul boerdery gebruik om winsgewend te bly.
“Moderne tegnologie is egter skaalafhanklik en kleiner besighede kan nie bekostig om die nodige toerusting te koop nie.”
Hy voeg by dat die plaaslike en uitvoermark sal moet groei om boere in die melkbedryf te hou. Hoewel Suid-Afrika ’n netto uitvoerder is, is die groei tans nie voldoende nie.
Coetzee sê die melkbedryf is siklies, maar produsentepryse en produksiemiddele se pryse is wisselvallig. Dit is moeilik om toekomstige siklusse te voorspel.
Hou koste laag
Coetzee se raad aan boere is om produksiekoste te verlaag deur die aankoop van produksiemiddele op die regte tyd.
“Kunsmis is byvoorbeeld duurder met planttyd en is dan later in die plantseisoen goedkoper.”
Hy voeg by dat boere winsgewendheid op plaasvlak moet verhoog deur produksiedoeltreffendheid te verbeter en streng te wees ten opsigte van vaste koste.
“As jy alles reg doen, moet jy meer inkry as wat jy uitgee.” Hy sê boere moet hul inkomste die goeie tye só bestuur dat hul boerdery uitgebrei kan word.
“Daar is verskeie faktore waaroor jy nie beheer het nie. Spits jou egter toe op dié wat jy kan beheer.”
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
