Vandag begin die verhoor van Nulane Investment in die hooggeregshof in Bloemfontein. Nulane Investment is in 2011 R24,9 miljoen betaal om ’n uitvoerbaarheidstudie vir die Mohoma Mobung-projek te voltooi.
Die staat voer egter aan dat Nulane Investment geen personeel gehad het nie en Deloitte as subkontrakteur aangestel en R1,5 miljoen betaal het om ’n verslag op te stel.
Nulane het toe vermoedelik aan dié verslag verander om aan te dui dat Paras Dairy, wat in Indië geïnkorporeer is, ’n geskikte vennoot vir die ontwikkeling van ’n melkverwerkingsaanleg is.
Mnre. Iqbal Sharma, Peter Thabethe, voormalige Vrystaatse LUR van landelike ontwikkeling, Limakatso Moorosi, voormalige Vrystaatse LUR van landbou, Dinesh Patel, Sharma se swaer en ’n verteenwoordiger van Nulane Investment, asook mee. Seipati Dhlamini, voormalige finansiële hoofbeampte by die Vrystaatse departement van landbou, en Ronica Ragavan, direkteur van Islandsite, verskyn vandag in die hof in verband met die saak.
Die nasionale vervolgingsgesag (NVG) voer aan die verdagtes het gekonkel om geld wat vir landelike ontwikkeling in die Vrystaat bedoel was, te herlei na Islandsite, ’n maatskappy wat deur die Gupta-familie besit en bestuur word.
Die verhoor sal na verwagting tot 3 Maart duur. Al die verdagtes het vandag onskuldig gepleit.
Estina-bedrogsaak
Die Estina-bedrogsaak word van Woensdag 25 Januarie in die hooggeregshof in Bloemfontein aangehoor. Thabethe, Dhlamini en Ragavan sal dan weer saam met mnre. Takisi Masiteng, voormalige direkteur van distriksdienste, Kamal Vasram, Estina-direkteur, Mosebenzi Zwane, voormalige Vrystaatse LUR, en me. Ugeshni Govender, voormalige werknemer by Sahara, in die hof verskyn.
Die saak hou verband met R280 miljoen wat na bewering via die melkplaas na Gupta-maatskappye herlei is sonder dat die oorspronklike begunstigdes van die projek enige voordeel gekry het.
Die Vrystaatse departement van landbou en landelike ontwikkeling het dié lys van begunstigdes as regverdiging gebruik vir die miljoene wat die staat in die projek belê het. Dit het egter net Estina, ’n maatskappy van die Gupta-familie, wat by die projek betrokke was, gebaat.
Volgens die NVG het Estina op 5 Julie 2012 met die Vrystaatse departement van landbou ooreengekom om ’n suiwelprojek in Vrede op die been te bring om voorheen minderbevoorregte boere en die mense van Vrede te baat.
Die ooreenkoms het bepaal dat Estina ’n kapitaalinspuiting van R228 miljoen moes voorsien. Paras Dairy is as Estina se vennoot voorgestel. Die ooreenkoms het verder bepaal dat die departement R342 miljoen oor ’n tydperk van drie jaar tot die projek sou bydra.
Van Julie 2012 tot April 2014 het Estina R280 miljoen ontvang. Estina het nooit sy finansiële bydrae tot die projek gemaak nie. Daar word steeds ondersoek waarom ’n behoorlike tenderproses nie vir die projek gevolg is nie.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
