’n Boer maak mos altyd ’n plan. Ons gedagtes oor hulle is: groot en sterk. En om nie bang te wees nie. Wat is die definisie van ’n boer? En hoe kom jy in aanmerking om een te word?
As die ernstige sy weggelaat word, is dit ’n onderwerp vir lekker spot. Soos die een dat dit iemand is wat met ’n bank se geld op die Land Bank se grond vir die koöperasie boer. Maar ’n ware boer se krippe lek nie en sy lyndrade is heel.
Natuurlik hang sy hekke nie en sy windpompe staan nie sonder ’n kop nie. Ek dink altyd dat ek meer bevoorreg was omdat ek op ’n plaas grootgeword het. Menigmaal het ek krippe skoongemaak saam met my pa. Met ’n konka, besem en skopgraaf oor die skouer het ons soms van krip tot krip gegaan.
