In die afgelope paar jaar is op verskeie platforms baie geskryf oor hoëdrukbeweiding. Dit sal sekerlik die bestaande weiding verbeter, soos reeds bewys is. Wat egter nie duidelik uit al die artikels na vore kom nie, is dat dit ’n baie duur opsie is, veral op huurgrond.
Daar word gesê dat dit die drakrag verdubbel. Om egter ’n mens se veegetalle te verdubbel, kos geld. Maar word ’n mens se inkomste verdubbel? Daar word gesê dat jy ’n daling in jou kalfsyfer kan verwag (tot op 75%).
Jou beeste word gedwing om die swak gras te eet en moet gevolglik byvoeding kry omdat die gras nie eintlik voedingswaarde het nie. Dit kos geld. Veral as jy nou in die somer ook duur voer moet gee. Beeste moet ook meer gereeld vitamiene en minerale gespuit word.
