Suid-Afrika is met sy lae gemiddelde reënval van 460 mm per jaar een van die droogste lande ter wêreld. Dit veroorsaak vele probleme vir die land, veral vir ons boere wat eenvoudig jaar ná jaar suksesvol moet boer om ekonomies te oorleef.
Ons boere wat van nature passievol is oor wat hulle doen, behoort trots te voel oor wat hulle met baie min staathulp in hierdie droë land vermag. Hulle is nie net goed geskoold nie, maar word met rede as van die bestes ter wêreld gereken. Selfs die regering behoort trots op sy boere te wees.
Ons boere se bydrae is in alle opsigte in landsbelang en kan geensins geïgnoreer word nie. Boere verskaf werk aan nagenoeg 800 000 werkers, verdien buitelandse valuta van honderde miljarde rande en slaag daarin om ons vinnig groeiende bevolking ten volle te voed.
