Die sewende produksieskatting vir somergewasse is pas deur die Nasionale Oesskattingskomitee (NOK) bekend gemaak. Die oppervlakte onder mielies geplant het dieselfde gebly, maar die tonnemaat vir mielies byna 3% meer as die skatting van Julie 2017.
Hoewel 3% nie soos baie mielies klink nie, is dit steeds 440 175 ton, baie meer as die totale opbergingsvermo? van enige van die heel grootste silokomplekse in Suid-Afrika. Dis duidelik dat vanjaar se oes alle verwagtinge oortref. Die jongste skatting is 18% meer as die eerste skatting in Februarie vanjaar.
Die sonneblom-oes is met 6% verhoog (1,37 ton per hektaar), sojabone het met 2% verminder, terwyl grondbone en sorghum onveranderd gebly het.
Meeste mielies uit Vrystaat
Wit mielies is 1,5% meer as die Julie-skatting, terwyl geel mielies se skatting met 4,4% verhoog is. Die totale opbrengs vir wit mielies word nou op 9,65 miljoen ton geskat, wat bykans drie keer meer as die vorige seisoen se witmielie-oes is. Meer as die helfte van vanjaar se wit mielies (5 miljoen ton) kom uit die Vrystaat. ‘n Geelmielie-oes van 6,76 miljoen ton word verwag. Die totale kommersi?le oes staan nou op 16,4 miljoen ton.
Die NOK het ook vir die eerste keer ‘n skatting vir die nie-kommersi?le mieliesektor gemaak. Dit beloop 731 000 ton. Suid-Afrika se totale mielieproduksie vir die 2016/16 seisoen is dus meer as 17 miljoen ton. Voorwaar ‘n rekord!
Die oppervlakte van 2,6 miljoen hektaar onder mielies is nie die groot “sondaar” van die reuse-oes nie. Inteendeel, mielieboere in Suid-Afrika ís besig om aanplantings minder te maak as dit met 2014/’15 (2,7 miljoen hektaar), 2013/’14 (2,7 miljoen hektaar), 2012/’13 (2,8 miljoen hektaar) en 2011/’12 (2,7 miljoen hektaar) se aanplantings vergelyk word.
Vergelyk dit
Hoe lyk die oeste vir die ooreenstemmende tye hierbo genoem? In 2014/’15 was die totale oes ondergemiddeld met 9,9 miljoen ton, in 2013/’14 ‘n groot 14,2 miljoen ton en daarna gemiddelde oeste van 11,8 en 12 miljoen ton.
Wat moet mielieboere doen? As daar vanjaar ‘n gemiddelde oes was, was daar nie te veel mielies nie. Dan was die gekerm oor afskaling seker ‘n beroep om hektare nie verder te verminder nie. Dit is op die ou end gunstige produksietoestande wat die hoofoorsaak van mielie surplusse is, nie hektare geplant nie.
Daar is nog ‘n laaste skatting volgende maand en ‘n finale aanplanting- en produksiesyfer in Februarie 2018 vir hierdie oes oor. Sal hierdie syfers ook elke keer meer word?
