Mielie-uitvoer het verlede week met sowat 30 000 ton opgeskiet vanweë verkope aan Brasilië en Suid-Korea. Luidens ’n berig op Fin24.com sê die Suid-Afrikaanse Graan-inligtingsdiens (Sagis) die land het verlede week 40 141 ton se wit mielies uitgevoer, vergeleke met 9 255 ton in die vorige week.
Brasilië het die grootste deel van die uitvoer, 28 800 ton, gekoop.
Die uitvoer van geel mielies, wat meestal vir voer gebruik word, het verlede week 72 604 ton beloop, vergeleke met 2 468 ton in die vorige week. Suid-Korea is die grootste koper van Suid-Afrikaanse geel mielies in die huidige bemarkingstyd, met 70 396 ton wat al daarheen uitgevoer is.
Die markte
Markpryse vir mielies het Dinsdag (5 April), laer gesluit vanweë die rand wat sterk gestaan het teen die dollar. Die rand het naby sy sterk vlakke van Januarie vanjaar beweeg.
Die mees aktiewe kontrak vir wit mielies in Julie het 1,32% laer op R1 650 per ton gesluit. Geel mielies vir lewering in dieselfde maand het 1,16% laer op R1 700 per ton gesluit.
Ná die oorskot van 4 miljoen ton mielies verlede jaar in Suid-Afrika aangeteken is, het me. Tina Joemat-Pettersson, die Minister van Landbou, Bosbou en Visserye, gesê die oorskot sal na opkomende ekonomieë uitgevoer word.
Bron: Fin24.com
6 April 2011
