Die hoofrede vir die groot styging in die mielie-liggingsdifferenisaal is dat die aanpassing op werklike syfers van die spoor- en padvervoerbedrywe gegrond is, sê die Johannesburgse Effektebeurs (JSE). Mnr. Chris Sturgess, die algemene bestuurder van kommoditeitsafleidings by die JSE, sê die aanpassing word gewoonlik op ’n persentasie van die vorige seisoen se differensiaal gegrond.
Hy sê dié jaar kon hulle volledige inligting oor spoor- en padvervoer uit die mark kry, en is die aanpassings op werklike syfers bereken. “Ons doen dit nie elke jaar volgens werklike syfers nie, en in sommige gevalle kon ons die differensiale weens die werklike syfers verlaag.”
Die aanpassings
Graan SA het verlede week bekend gemaak dat die JSE aangekondig het dat die differensiaal vir 183 silo’s met gemiddeld 28% verhoog is, terwyl dit vir individuele produsente met tussen -19% (R21 per ton) tot 68% (R161 per ton) aangepas is.
Sturgess sê aangesien slegs 20% van Suid-Afrika se produkte per spoor vervoer word en padvervoer baie duur is, is van die aanpassings in afgeleë gebiede hoog. Hoë oliepryse het natuurlik ook ’n rol gespeel in die bepaling van padvervoerkoste, wat ’n duur bron van vervoer is.
’n Balans
Sturgess sê hulle verstaan en erken dat dié aanpassing in sommige dele hoog is. “Ons moet wel onthou dat die rede vir die diffirensiaal is om te help om kontrakte te standariseer. Die koper het nie ’n keuse van by watter silo hy wil koop nie, terwyl die leweraar kan kies tussen 193 silos. Ons moet regverdig wees teenoor die koper en die verkoper albei.”
Hy sê die aanpassing is nie ingefaseer nie, omdat hulle nog nooit van tevore ’n aanpassing ingefaseer het nie. Klik gerus hier om die berig oor Graan SA se kommentaar te lees.
11 April 2011
