Die nasionale mielie-oes is onveranderd gelaat op 14,3 miljoen ton, die naasgrootste nog. Die gemiddelde opbrengs van 5,32 ton per ha is die land se hoogste nog, sê die Nasionale Oesskattingkomitee het in sy finale raming vir somergewasse
Intussen dreig dalende mieliepryse op die toonaangewende Chicago-beurs om ook na die JSE oor te spoel, sê mnr. Wessel Lemmer, senior ekonoom van Graan SA.
Dié land se mielie-oes, die wêreld se grootste, oortref alle verwagtinge, en hul mieliepryse het teen middel verlede week tot ’n vyf-jaar-laagtepunt geval. Dít kom te midde van besonder gunstige produksietoestande, en ’n skamele twee jaar nadat die strafste droogte in dekades mieliepryse daar tot ’n rekord-hoogtepunt gevoer het.
Plaaslike mieliepryse het die laaste ses maande skerp geval namate die plaaslike oes aanvanklike verwagtinge telkens oortref het. Die Oesskattingkomitee se finale beraming van 14,3 miljoen ton is byna 2 miljoen ton meer as die seisoen se heel eerste vooruitskatting van 12,4 miljoen ton in Februarie.
Intussen het Graan SA ook in sy jongste raming van plaaslike voorrade die verwagte uitvoersyfer vir die heersende bemarkingsjaar ietwat verlaag, tot 1,84 miljoen ton. Die jaar se verwagte nasionale oorskot staan nou op 916 000 ton, wat pryse steeds naby aan die laer uitvoerpariteit-vlak en onder gelykbreek met produksiekoste hou, sê Lemmer.
Dr. Dirk Strydom, landbou-ekonoom van die Vrystaatse Universiteit, voorspel dat mieliepryse nie binne die volgende jaar tot 18 maande gaan herstel nie.
Hy het op ’n onlangse boeredag van Agri Hertzogville gesê dit is onwaarskynlik dat dié pryse teen Desember vanjaar met meer as R250 gaan styg.
