Mnr. Wilbie Venter, makelaar en markontleder van die landboutegnologiemaatskappy neXgro, het op die maatskappy se vooruitskouingskonferensie Lanvokon in Muldersdrift gesê boere moet bewus wees van internasionale faktore wat pryse bepaal, omdat dit ook plaaslike pryse bepaal. “Ons mark het selde sy eie dinamiek.”
“Daar word al meer mielies in die wêreld geproduseer, maar die vraag bly ook styg en die eindvoorraad bly daal. Daar is ál minder ruimte vir verrasings.”
China hou sowat 70% van die wêreld se eindvoorraad, maar verstrek geen inligting hieroor nie. Venter het gesê volgens syfers oor die persentasie van produksie wat as eindvoorraad oorbly, China s’n uitgesluit, was die wêreldeindvoorraad in die 2020-’21- en 2021-’22-seisoen 10% en 10,3% van produksie en die verwagte eindvoorraad vir 2022-’23-seisoen is 10,1%.
