Die Regering hoop om sowat R25 miljard se internasionale beleggings te bekom om waterinfrastruktuur te verbeter, sê me. Edna Molewa, Minister van Waterwese en Omgewingsake.
Luidens ’n berig op Engineering News het Molewa Woensdag (14 Maart 2012) op die Wêreldwaterforum in Marseille, Frankryk, gesê: “Ek dink vir eers sal ’n derde (van sowat R75 miljard) genoeg wees.”
’n Totale bedrag van R75 miljard is verlede maand in die nasionale Begroting vir die bou van nuwe waterstelsels en die verbetering van bestaande stelsels oor die volgende drie jaar toegeken. Volgens die minister sal dit ideaal wees as hulle “rand-vir-rand”-ooreenkomste met private beleggers kan aangaan.
Behandelingsaanlegte
Die minister sê die staat oorweeg dit tans om die bou en bestuur van sy waterbehandelingsaanlegte aan private maatskappye oor te gee. Sy sê haar departement ondersoek “die moontlikheid dat van die behandelingsaanlegte ontwikkel, besit en bestuur word deur die private sektor, moontlik selfs deur ’n openbare-private vennootskap.”
Molewa sê die departement is in die finale stadium om ’n 10 tot 15 jaar-plan vir die land se waterinfrastruktuurbehoeftes af te handel, en ’n sakeplan op te stel.
Bron: Engineering News
15 Maart 2012
