Die bedrag is deel van die maatskappy se kapitaalbelegging van R120 miljoen om te verseker hy kan sy bedrywighede voortsit wanneer fase 6- tot fase 8-beurtkrag ingestel word.
Die R35 miljoen deel wat vir waterverwante infrastruktuur geoormerk is, sluit besteding op wateropgaarkapasiteit by sy vervaardigingsaanlegte in.
“Beurtkrag bring ’n heeltemal nuwe en bykomende bedreiging vir waterbeskikbaarheid in Suid-Afrika, omdat energie watervloei aandryf. Sonder krag is daar ’n risiko dat ons krane droog kan word,” sê mnr. Derek McKernan, vervaardigingshoof van Tiger Brands, in 'n verklaring wat gister op Wêreldwaterdag uitgereik is.
“ ’n Organisasie soos Tiger Brands se vermoë om noodsaaklike voedselprodukte aan verbruikers te verskaf, word belemmer wanneer beurtkrag voortduur en die behoefte toeneem om kragverbruik te verminder.
“Ons belegging van miljoene rande sal ’n mate van sekerheid bied dat winkelrakke tydens langdurige hoë vlakke van beurtkrag vol bly met noodsaaklike voedselprodukte.”
Tiger Brands sê die hele voedselwaardeketting is afhanklik van water, vanaf die gewasse wat moet groei, tot die vervaardiging van voedselprodukte en die verspreiding daarvan na die eindverbruiker.
Suid-Afrika is ’n waterskaars land en dit is noodsaaklik vir die sakesektor, veral ondernemings wat noodsaaklike dienste of goedere bied, soos die voedselsektor, om daarvoor te beplan dat hul bedrywighede so min as moontlik ontwrig word.
Vermindering van gebruik
McKernan sê Tiger Brands het ’n allesomvattende benadering tot die vermindering van sy uitwerking op die omgewing, insluitend waterhulpbronne.
“As ’n onderneming is ons baie ernstig oor ons verantwoordelikheid om ons uitwerking op die omgewing so klein as moontlik te maak deur ons watergebruiksintensiteit te verlaag.”
Die maatskappy wil teen 2030 sy watergebruiksintensiteit met 30% verminder. Moontlikhede om watergebruik te verminder word by al sy persele ondersoek en in werking gestel en die maatskappy wil ook ’n kultuur van waterrentmeesterskap onder sy werknemers kweek.
In sy boekjaar tot 30 September 2022 het die maatskappy sy watergebruiksintensiteit op ’n jaargrondslag met 7,1% verminder.
Hulp aan gemeenskap
Tiger Brands ondersteun die Ashton-munisipaliteit in die Wes-Kaap met kragopwekkers en kundigheid om te verseker die dorp het water, asook die Langeberg- en Ashton-vervaardigingsaanlegte wat water nodig het vir die tydige verwerking van vars vrugte.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
