Dié wetsontwerp bepaal dat niemand in die land minder as ’n basiese loon van R20 per uur mag verdien nie.
Mnr. Jackson Mthembu, parlementêre hoofsweep van die ANC, sê die nasionale minimum loon sal tot voordeel wees van die sowat 75% van landbouwerkers wat minder as R2 000 per maand verdien, en 90% van huiswerkers wat minder as R3 120 per maand verdien.
Die Regering het aanvanklik beoog dat die loon op 1 Mei vanjaar in werking sou tree. Parlementêre prosesse moes egter eers voltooi word en die proses kon nie kunsmatig versnel word nie. Dit het ’n tydelike blaaskans gebied aan diegene wat werkers onderbetaal.
Ramaphosa het as adjunkpresident die ondersoekproses na ’n minimum loon gelei. Die oogmerk daarmee is om armoedsvlakke en ongelykheid te verminder.
Ander arbeidswetgewing wat deur die NRP aanvaar is, is die wysigingswet op arbeidsverhoudinge, die wysigingswet op basiese diensvoorwaardes en die wysigingswetsontwerp op arbeidswette.
Mnr. Matthew Parks, Cosatu se parlementêre koördineerder, sê die wetgewing sal daartoe lei dat die lone van miljoene werkers toeneem.
“Dit sal toesien dat die lone van plaas- en huiswerkers binne twee jaar verbeter word. Dit sal ’n groot kontantinspuiting vir werkers wees.”
Werkgewers wat nie aan die vereistes van die wetgewing voldoen wanneer dit bekragtig is nie, sal boetes opgelê word, tensy hulle om kwytskelding aansoek gedoen het en dit goedgekeur is.
