Dít is vir volgens die nuutste misdaadsyfers wat Vrydag deur mnr. Bheki Cele, minister van polisie, vir die tweede kwartaal van die jaar bekend gemaak is.
Mnr. Willie Clack, voorsitter van die nasionale veediefstalvoorkomingsforum, sê die nuutste syfers van die polisie toon veediefstal in die land het met 4,9% in die tweede kwartaal teenoor die ooreenstemmende tydperk verlede jaar afgeneem.
Daar was in drie provinsies – Limpopo, Gauteng en Noordwes – wel ’n klein toename. Die res van die provinsies se veediefstalsyfers toon almal ’n afname, met die Oos-Kaap wat die grootste daling vir die oorsigtydperk toon.
“Dit is duidelik dat alle eiendomsverwante misdade in die land aan die afneem is. Ons kan dit net toeskryf aan beter beheer, beter selfpolisiëring en beter sekuriteit wat ons toepas om ons eiendom te beskerm.”
Plaasmoorde
Dr. Pieter Groenewald, leier van die VF Plus, sê die statistieke toon ’n effense afplatting in die aantal plaasmoorde met 10 slagoffers wat vir die tydperk aangemeld is teenoor die 14 slagoffers vir die ooreenstemmende tydperk verlede jaar.
“In die eerste drie maande vanjaar is 12 plaas moorde aangemeld,” sê hy. “Ek het gevra dat die aantal plaasaanvalle ook aangedui moet word, wat toe nie gedoen is nie en ek sal dit opvolg in die parlement se portefeuljekomitee vir polisie.
“Die afname in plaasmoorde word wel verwelkom. Dit bewys dat landelike gemeenskappe self beter beveiliging begin toepas.”
Volgens hom is die afgelope tweede kwartaal se totale moordsyfer die hoogste die afgelope vyf jaar.
Altesame 6 424 mense is in die tweede kwartaal vanjaar vermoor (11 uit 100 000) teenoor 5 760 vir die vergelykbare tydperk verlede jaar – ? toename van 11,5%. Vergeleke die eerste kwartaal vanjaar het dié syfer met 5,61% toegeneem.
Vroue en kinders word toenemend slagoffers van geweldsmisdaad
“Geweldsmisdaad teen vroue en kinders het veral skerp toegeneem. Moord op vroue het die afgelope kwartaal met 53,2% gestyg teenoor die ooreenstemmende tyd verlede jaar en op kinders met 46,4%.”
Ander geweldsmisdaad teen vroue en kinders het ook toegeneem.
Daar was ’n toename van 31,4% in poging tot moord op vroue en 54,7% in aanranding met die opset om ernstig te beseer.
Wat kinders aanbetref, is die syfer vir aanranding met die opset om ernstig te beseer nog hoër op met 58,4% en poging tot moord met 57,4%.
“Die afname in seksuele oortredings waar vroue en kinders meestal die slagoffers is, word verwelkom. Die VF Plus doen nogtans ’n beroep op slagoffers om na vore te kom.
“Ernstige probleme met onder meer DNS-toetsing by die polisie se laboratoriums het in die jongste jare ’n groot invloed gehad op die afhandeling van sake en die vervolging van seksuele oortreders.
“Hoe ’n groot rol dit speel in die feit dat slagoffers moontlik moed opgegee het om sake aan te meld, is ’n ope vraag.”
Ontvoerings
Hy sê nog ’n kommerwekkende neiging is die deurlopende skerp toename in ontvoerings. Dit het in die tweede kwartaal vanjaar toegeneem met 59,1% (3 550) teenoor verlede jaar se 2 232.
In die eerste kwartaal vanjaar het dit toegeneem met 109,2% teenoor verlede jaar.
“Dit is duidelik dat ’n strategie hiervoor dringend nodig is,” volgens hom.
Min vertroue in polisie
“Navorsing toon dat slegs 27% van die publiek nog die polisie vertrou. Uiteindelik is dit die onbevoegdheid van die ANC-regering wat bygedra het tot die feit dat die polisie sy angel verloor het en vir die gebreke in die strafregstelsel.”
Mnr. Bennie van Zyl, hoofbestuurder van TLU SA, sê dis hartseer dat Suid-Afrika in ’n wipplankryery verval het waar misdaad styg en sak ten opsigte van verskillende dele daarvan.
“Ons behoort eerder tot nul te beweeg. Die land se hele veiligheidstelsel moet eintlik ’n glyplank wees na nul toe.”
Hy sê al is daar verbeteringe van sekere syfers, is dit steeds onaanvaarbaar en dis nie iets om oor bly te wees.
“Bestuur van veiligheid in ons land het as’t ware ’n klug geword weens politieke omgewing, die wil van ’n minister, politieke wilskrag en vele ander redes.”
