Kenners van die Sheffield-universiteit sê die erosiekoers van geploegde lande is gemiddeld 10 tot 100 keer vinniger as die koers van grondvorming en amper 33% van die wêreld se bewerkbare landbougrond is oor die afgelope 40 jaar aan erosie of besoedeling afgestaan.
Hulle voeg by dat intensiewe boerderymetodes nie meer volhoubaar is nie en dat dit afhanklik is van die toediening van kunsmis. “Dit as katastrofies as jy oorweeg dat dit sowat 500 jaar neem om 2,5 cm bogrond te vorm onder normale landboutoestande. ’n Volhoubare model vir intensiewe landbou kan die lesse uit ons geskiedenis leer kombineer met ons kennis van biotegnologie,” sê prof. Duncan Cameron, professor van plant- en grondbiologie by die universiteit.
Die Sheffiled-navorsers sê die model wat hulle voorstel is in die beginsels gegrond:
- Die bestuur van die grond deur die toediening van mis, wisselbou en geenbewerking om die grond se organiese materiaalvlakke, struktuur, waterhouvermoë en voedingstowwe te herstel.
- Die gebruik van biotegnologie om gewasse van die kunsmatige wêreld wat vir hulle geskep is, te speen en sodoende die plante se naby kontak met grondmikrobes te verbeter.
- Die hergebruik van voedingstowwe in riool. Anorganiese bemesting kan uit riool in grootskaalse bioraffinaderye vervaardig word. Verskeie tegniese probleme sal egter eers uit die weg geruim moet word, wat deur middel van navorsing sal geskied, sê hulle.
Mnr. Peter Horton, mede-direkteur van die universiteit se Grantham Sentrum vir Volhoubare Toekomste, sê om so ’n totale herontwerp van die landboustelsel daar te stel sal ’n evaluasie van moontlike wetenskaplike, ekonomiese, kulturele en politiese struikelblokke gemaak moet word, waarna ’n lys van moontlike voordele beskikbaar gestel moet word.
“Sodoende kan ons ons afhanklikheid van energie-intensiewe en nie-volhoubare anorganiese bemesting afskaal, besoedeling van waterweë verminder en goeie grond vir ons nageslagte nalaat. Daar is natuurlik nie een model wat vir almal sal werk nie.”
