Die invloed van radikale beleidsvoorstelle in Suid-Afrika is ernstig – nie noodwendig omdat dit implementeerbaar is nie, maar weens die klimaat van onsekerheid wat daardeur geskep word, sê mnr. Daniel Silke, ’n onafhanklike politieke ontleder.
Hy het by AMT se vooruitskouingskonferensie in Pretoria gesê die gevaar bestaan dat die Regering grond sonder vergoeding sal kan onteien onder die dekmantel dat hy nie die nuwe eienaar word nie, maar net die bewaarder daarvan vir die land se mense is. “Dit sal geweldige nadelige gevolge vir die ekonomie inhou en ek kan nie sien dat so iets in die nabye toekoms kan gebeur nie.”
Hy sê dit skep egter ’n ongunstige beleggingsklimaat en boere verkies om eerder hul geld buite die landbousektor, óf selfs buite die land, te belê. Dit het ook ’n baie slegte invloed op werkskepping in die sektor.
“Kommersiële boere moet in ’n vyandige politieke omgewing hul werk doen, waar hulle ál meer as ’n politieke voetbal gebruik word te midde van ’n ANC-party wat meer onseker van homself is as ooit tevore is.”
Silke verwag dat die moeilike tye vir boere sal voortduur. Soos wat die ANC stedelike stemme verloor sal hy toenemend probeer om sy landelike steunbasis te beskerm deur tradisionele leiers as grondbaronne te behou.
Hy sê ’n groot deel van die verwagte 379 000 nuwe grondeise oor die volgende vyf jaar sal uit die ou tuislande kom. Die Regering sal poog om tradisionele leiers gelukkig te hou deur grond en ander skenkings wat groot druk op die staatskas sal plaas. Die verwagte koste vir die volgende 15 jaar daarvoor sal R200 miljard beloop terwyl daar skaars vir 10% daarvan begroot is.
Die ANC is vasgevang in ’n politieke en ideologiese harnas wat hom verlam weens die vrees dat die alliansie met die vakbonde en SA Kommunistiese Party kan skeur. Hy kan ook nie besluit of die private sektor ’n vriend of vyand is nie. Daarom kan die uitvoering van die Nasionale Ontwikkelingsplan nie aan die gang kom nie.
