Clover het op 19 Oktober op die JSE se Sens-nuusdiens bekend gemaak dat hy in gesprek is met ’n ander onderneming, wie se naam nie genoem is nie, wat beoog om al sy uitgereikte aandele te koop.
Die Clover-aandeelprys het die vorige dag, 18 Oktober, op R14,10 gesluit, maar ’n paar dae later, op 23 Oktober, het dit op R17,16 gesluit.
Mnr. Nick Kunze, takbestuurder van Bridge Stockbrokers, ’n onderneming wat beleggingsfondse bestuur, sê Clover se aandeel is histories nie duur nie en bied goeie waarde vir ’n voornemende koper.
Clover se markkapitalisasie is R3,26 miljard en volgens Kunze verteenwoordig sy prys-tot-boekwaarde van 1,15 billike waarde, veral vergeleke met dié van ander genoteerde suiwelmaatskappye in die wêreld.
Clover se dividenduitbetaling van 4,4% is volgens hom ook beter as dié maatskappye s’n.
Clover was eens ’n koöperasie, het in 2003 ’n openbare maatskappy geword en is in 2010 op die JSE genoteer.
“Vir aandeelhouers was dit ’n wilde rit,” sê Kunze. Die aandeelprys het byvoorbeeld in Januarie tot R11,50 gedaal en in April tot R19,89 gestyg. “Dit was tot dusver moeilik om te verstaan wat Clover se waarde werklik is.”
Kunze sê die maatskappy het homself in die afgelope drie tot vyf jaar herontwerp en het nou ’n verskeidenheid produkte onder ’n mededingende handelsmerk.
Hy is baie optimisties oor die reuse-potensiaal vir melkbedrywighede in Afrika en sê dít kan die rede wees “hoekom ’n derde party skielik rondsnuffel”.
“Vir ’n voedselproduk so basies en noodsaaklik tot die mens se dieet soos melk, bly die verbruiks- en vraagpotensiaal van melk in Afrika onderontgin.”
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
