Die verdagte wat mnr. Frans Koch (69) en sy vrou, Ingrid (65), Maandagoggend op hul plaas Klipheuwel by Moorreesburg aangeval het, sal waarskynlik eers op Maandag 11 April in die hof verskyn nadat hy gister ’n operasie in die Paarl-hospitaal ondergaan het.
Die nasionale vervolgingsgesag (NVG) het bevestig dat die 34-jarige verdagte van moord, poging tot moord en roof aangekla sal word. Die NVG is egter onseker of die verdagte in ’n toestand sal wees om in die hof te kan verskyn.
Volgens die plaaslike plaaswag het ’n man die huis tussen 10:30 en 10:40 binnegegaan waar hy die Kochs met ’n mes aangeval het. Mediese personeel het Ingrid op die toneel dood verklaar, terwyl Frans vir mediese behandeling hospitaal toe geneem is.
’n Huishulp het glo uit die huis ontsnap en hulp ontbied. Die aanvaller is kort daarna deur die werkers op die plaas aangekeer.
Landbou.com het by die polisie navraag gedoen oor die toestand waarin hulle die verdagte op die toneel aangetref het. Sers. Wesley Twigg, polisiewoordvoerder, het bevestig dat die verdagte beserings opgedoen het voor hy in hegtenis geneem is.
