Die Kabinet se besluit om ’n moratorium te plaas op die uitreiking van enige lisensies vir hidrouliese breking (“fracking”) tot tyd en wyl die implikasies daarvan behoorlik nagevors is, word wyd verwelkom.
Hoewel die Kabinet ook aangekondig het dat ’n multi-dissiplinêre span die omgewingsimplikasies van hidrouliese breking sal ondersoek, word anti-brekingsaktiviste se optimisme getemper deur ’n gebrek aan genoeg inligting.
Die Treasure the Karoo-aksiegroep (TKAG) verwelkom die besluit en sê hy was van die begin af vol vertroue dat die Suid-Afrikaanse Regering die regte besluit sou neem en die beste internasionale praktyke sou volg.
“Die Kabinet het duidelik uit die lesse ander lande geleer, naamlik dat die kwessie van hidrouliese breking te ingewikkeld is om besluitneming daaroor aan ’n enkele instansie of departement oor te laat. So ’n omvangryke kwessie vereis oorweging deur ’n multi-dissiplinêre span.”
Die regsimplikasies van die moratorium hang van baie dinge af, sê dr. Luke Havemann van Havemann Inc, ? firma wat in energiesake spesialiseer en leier van die span spesialiste wat die TKAG se geskrewe beswaar opgestel het.
Havemann sê ’n moratorium is nie ’n verbod nie, dis bloot ’n “handrem” wat tydelik opgetrek is, dog die gebrek aan inligting maak dit moeilik om kommentaar te lewer.
“Ons probeer byvoorbeeld om meer inligting te kry oor die duur van die moratorium, en of dit genoeg tyd laat om ’n deeglike impakstudie te doen. Ons wil ook weet wie die lede van die ondersoekspan gaan wees.”
Havemann sê dis nietemin goed om te weet dat die maatskappye wat aansoek gedoen het om lisensies om vir skaliegas te soek, nou moet wag. “Dít is vir ons ’n oorwinning, en ek is trots daarop dat ons Regering die beste internasionale praktyke volg.”
Hy meen dat die groot belangstelling in die kwessie betrokke partye sal dwing om meer inligting bekend te maak. Dr. Andreas Späth, bestuurder van Lobby Books, omgewingsaktivis en ’n rubriekskrywer op News24, verwelkom die besluit, maar soek meer inligting.
“So ’n moratorium gaan gewoonlik gepaard met sekere voorwaardes. Daar kan dalk ’n verbod op hidrouliese breking wees totdat daar bewys word dit is veilig, of so iets. Of beteken hierdie moratorium dat die maatskappye wat vir skaliegas soek, dalk mettertyd toegelaat sal word om die gas te onttrek, maar deur ander metodes? Ek dink dus die moratorium is goed, maar ek bly lugtig.”
21 April 2011
