Die Suid-Afrikaanse hoë kommissaris en die provinsiale regering van Gaza in Mosambiek bied teen die einde van die maand, tesame met Agri SA, ‘n landelike ekonomiese ontwikkelings-landbouforum in Gaza aan.
Dr. Theo de Jager, ondervoorsitter van Agri SA, sê sowat 800 plaaslike boere het reeds belange in dié land.
De Jager sê die forum word aangebied met die bedoeling dat onder meer dié land se aanbod aan boere, sy voorwaardes, gebruiksreg van grond en hulpbronne, en voordele bespreek kan word. “Sake wat tot dusver gepla het, sal ook bespreek word. Ons het nou al ‘n bietjie ervaring met veral administrastiewe haakplekke.”
Die Suid-Afrikaanse hoë kommissaris in Mosambiek sal as die gasheer vir die forum optree, wat op 25 November gehou word.
Fokus op Gaza
Volgens De Jager sal Mosambiek se aanbod veral op die Gaza-provinsie, wat net noord van die Kruger Nasionale Park naby Limpopo en Mpumalanga, fokus.
“Brasilië en China het reeds groot landbou-ontwikkelings in die land en die streek, maar daar bestaan nog baie geleenthede vir Suid-Afrika,” verduidelik De Jager. Die Gaza-streek is ‘n goeie gebied vir veeboerdery, maar ook die aanplant van vrugte en avokados.
Probleme
De Jager sê Mosambiek is ook besorg oor die besoedeling van veral die Krokodilrivier deur onder meer Suid-Afrikaanse myne, aangesien die land daarvan afhanklik is vir besproeiing en watergebruik.
Sommige Suid-Afrikaanse boere in Limpopo is glo ontevrede oor die invloed wat produksie in Mosambiek op plaaslike markte en pryse het. Hierop sê De Jager: “Ek as ‘n Suid-Afrikaanse boer sal eerder met ‘n ander Suid-Afrikaanse boer in ‘n buurland meeding, as om met ‘n Chinese of Brasilaanse boer te moet meeding.”
5 November 2010
