Die Suid-Afrikaanse Qualité-prysoorhandiging was op Donderdag 25 Mei 2023 by Eensgezind buite Durbanville.
Die wenproduk, Woolworths se 600 g Ayrshire Mozzarella, was een van 929 melkprodukte van 71 vervaardigers wat deur ’n span van 80 beoordelaars beoordeel is. Uit die groot aantal inskrywings is 106 produkte as kampioene aangewys, wat as die wenners in elke kampioenskapsklas uitgestaan het. Vanjaar is 23 produkte met die Qualité-merk van uitnemendheid vereer.
Alan Fourie, die kenner en hoofbeoordelaar, sê om die Produk van die Jaar-prys los te kon slaan, is elke vervaardiger se droom. “Die 600 g Woolworths Ayrshire Mozzarella is ’n uitsonderlike pizza-mozzarella wat hierdie prys waardig is. Dis ’n ferm en gladde kaas, met ’n effens romerige voorkoms, wat maklik rasper en perfek smelt. Die kaas se romerige, sagte en gekaramelliseerde geur is besonders.”
Robert Sudell, bedryfsbestuurder van RFG Foods, sê sy span is verheug om vir hierdie vlagskipproduk vereer te word. “Mozzarella vorm al vir langer as 25 jaar die kerngrondslag van RFG Foods,” sê Sudell. “Ons klein boetiekkaasspan, onder leiding van die kaasmaker Kerwick Boonzaaier, is ware kundiges. Hulle sny kaas met die hand as deel van ’n proses wat ondersteun word deur Italiaanse bestanddele en toerusting om mozzarella te maak wat gelykstaande aan die beste ter wêreld is.”
Suiwel-ererol: Agri-Expo vereer topkenner
Tydens die seremonie geleentheid het Agri-Expo die suiwelkenner Suzy O’Regan vir haar uitsonderlike en dinamiese leierskap in die melkbedryf vereer.
O’Regan, ’n produkontwikkelingsbestuurder vir Woolworths Food, is die tweede vrou wie se naam op die lys van staatmakers in die bedryf, die Agri-Expo Suiwel-ererol, verewig word. Sy is al langer as 20 jaar ’n beoordelaar by die suiwelkampioenskappe. Sy is ook ’n lid van ‘n paneel internasionaal-erkende kundiges by die World Cheese Awards.
“Agri-Expo het in 1992 besluit om die ererol in te stel om erkenning te gee aan bedryfsleiers se uitstekende bydrae tot melkprodulte,” sê Breyton Milford, hoofbestuurder van Agri-Expo “Hierdie eerbewys is oor 31 jaar aan slegs nege mense oorhandig wat op die uiters hoë vereistes vir die benoemings dui.”
O’Regan is genomineer vir haar besonderse bydrae tot die groei, ontwikkeling en langtermyn sukses van die SA Suiwelkampioenskappe.
Toekoms van melkbedryf
“Die Suid-Afrikaanse melkbedryf moet op innovering klem lê en voortdurend aanpas om tersaaklik te bly in ’n hoogs mededingende kommersiële en handelsomgewing.” Só sê dr Tertius Cilliers, ’n beoordelaar en hoofbeampte van Synercore, ’n beleggingsmaatskappy wat innovering in die voedselbedryf in Suider Afrika vooropstel.
“Ondanks die probleme wat die melkbedryf en in die algemeen as Suid-Afrikaners in die gesig staar, is hierdie gebeurtenis ’n herinnering dat verandering opbouend kan wees,” sê Cilliers. “Wat vanjaar inspirerend was, was die deelname van nuwe vervaardigers, innoverende produkinskrywings en beoordelaars wat vir die eerste keer deelgeneem het. Dit was fantasties om te ervaar hoe hierdie projek gegroei het tot ’n wêreldklasgebeurtenis.”
Volgens Milford getuig vanjaar se hoë aantal inskrywings en uitstekende resultate van ’n innoverende bedryf en gesonde mededinging tussen groter vervaardigers en kleiner entrepreneurs. “Baie geluk aan Fair Cape Dairies wat vyf Qualité-eerbewyse gewen het; Lactalis Suid-Afrika, wat vier Qualité’s verwerf het; De Pekelaar wat drie Qualité’s gewen het; Polar Ice Cream Company wat met twee Qualité’s bekroon is, asook al die ander wenners.”
Agri-Expo bedank die Platinum-vennoot Synercore sowel as al die ander vennote van die suiwelkampioenskappe vir hul verbintenis tot die ontwikkeling van die suiwelbedryf.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
